A‘oa‘oga
O Fasitoouta lava i le a‘oga maualalo sa fofoa ai lona soifua a‘oa‘oina, aemaise ai le tāua o le a‘oga faifeau sa a‘oa‘oina ai foi. Sa ia manatuaina foi le susuga i le faafeagaiga sa tausia le nuu i lena vaitaimi, ma sa fesoasoani tele a‘oga a faifeau i totonu o afioaga taitasi mo le olaga a‘oa‘oina, e pei ona ta‘ua e Anuilagi, ma ia taumafai e faamatalaina.
Na mae‘a le a‘oga tulagalua a Fasitoouta, ona sosoo ai loa lea ma le a‘oga a Malifa. E lē o manatua foi e le tamaitai, poo le ā le maualuga o le a‘oga a Malifa sa toe ulufale i ai ma faalautele ai lona soifua a‘oa‘oina i lena lava vaitaimi.
O le auai i le a‘oga a Malifa, ona sa naunau lona tamā ma lona tina ina ia aga‘i e saili ai se galuega lelei mo ia e tausi ai le aiga.
O lana faamatalaga foi sa faapea, o Malifa o se a‘oga faato‘ā mafai foi ona ulufale i ai, pe afai ae nofo i Apia i le taulaga.
O aiaiga ia o le a‘oga a Malifa sa iai i lena foi vaitaimi, sa mafua ai loa ona siitia ma nofo i lona aiga i le taulaga i Apia, ina ia mafai ai ona maua le avanoa faaauro e ulufale ai i le a‘oga sa faamoemoe i ai.
E tolu tausaga sa a‘oa‘oina ai pea i Malifa, ma o tausaga foi ia sa aumau ai pea lava i Apia mo le taumafaiga o le a‘oga.
O Anuilagi, o se tagata sauā tele e pei ona ia tau faamatalaina, sa ia ta‘ua e toatele ni tamaitai a‘oga sa faaoolima i ai, ona o lona malosi tele sa iai, e oo lava foi i le itupa o tama a‘oga, sa lei foi ai lona fasi tagata.
O upu lava sa saunoa i ai le tamaitai, sa ia ta‘ua foi e oo lava i tama ma teine e matutua ia te ia, sa lē foi ai lana upu ma lana tala malosi. E mālie tele saunoaga ma faamatalga a le tamaitai.
O le isi vaega sa ia manatua foi i le taimi o a‘oa‘oga, sa ia toe tautino lava, o ia o se tagata e tautala leaga ma fai upu masoā i lona lava taimi a o malosi.
E leai se isi e tau latalata ane ia te ia i lena vaitaimi ona o ona uiga e pei ona sa ia ta‘ua. E ui ina sa suia lea faaletonu i lona olaga mulimuli ane, ae fiafia lava ia e tautalatala i mea sa ia faia.
O Anuilagi e lei faaipoipo, ma sa ia tautino lava e leai sona aiga sa faia, ma o loo ia tauaveina pea lona tulaga mamalu o se tamaitai Samoa.
E toatele ma anoanoai ni tama talavou e oo lava i alii a‘oa‘o, sa faatō‘ai ane o latou manao ia te ia a o talavou, peitai e lei taitai ona aga‘i i ai sona mafaufau.
