Faafetaia le sao o Hennie Tonu‘u ua tuumalo

O le afiafi o le Aso Tofi na tea nei sa faapea ona faatumulia ai le Hennie’s Sports Bar & Motel i le sauniga faaleaiga o le afioga Aiolupotea Faletolu Hennie Tonu‘u, a o lei molimoliina atu lona sā mo ona toe sauniga i lona aiga i Fasitoo-Uta i le aso na sosoo ai.

O Aiolupotea ma le faletua ia Malavai Pafuti e pulea le Hennie’s Sports Bar & Motel i Fugalei o loo avea ma nofoaga e faatasitasi i ai le tapuaiga a i latou e fiafia i taaloga e maimoa i le TV aemaise lava i taaloga lakapi a le Manu Samoa ma le au Taitoafitu a le atunuu.

O le ala foi lea na vaaia ai le toatele o tagata taaalo sa auai i lea afiafi. Sa faapea foi ona auai sui o le kamupani o le Event Polynesia e tauaaoina sa latou teufugalaau ma meafaipele ua sainia e tama fusu e faafetaia ai le lagolago lē faatuaoia a Aiolupotea ma Malavai i le toe lalagaina o fusuaga faapolofesa i Samoa.

Faaalia e Teleiai Edwin Puni o le pulega a le Event Polynesia, “E lē mafai ona faagaloina le tali mai a Aiolupotea ma Malavai i le limavaivai o mea tau seleni o loo taumafai ai fusuaga Samoa Pro Am Fights mo avanoa e maua ai taaloga a tama fusu faapolofesa i totonu o Samoa.”

“Ese mai i le lagolago a le Malo e ala mai i le TAB, le SSAF ma le Komiti o le Sisigafu‘a 2010, pau pisinisi faapaaga o loo fesoasoani mo fusuaga SPAF o le Hennie’s Sports Bar & Motel ma le fale faamalositino o le JP Fitness i Fugalei mo koleniga a nisi o tama fusu.

“O le amataga o le tausaga 2009 na maua ai le fesoasoani a le Hennie’s Motel & Sports Bar i avanoa e nonofo ai nisi o tama fusu i lo latou faletalimalo i taimi o fusuaga SPAF.
E lē gata i lea ae o le avanoa sa faigaluega ai nisi o tama fusu e mamao aiga ina ia mafai ona maua se seleni e tua i ai a o iai i koleniga i Apia.”

Faaalia foi e Teleiai le agaga faafetai tele i nisi o kamupani e pei o le afioga ia Lemalu Ray Ah Liki ma le Samoa Commercial Bank, faapea Andrea Williams Stewart ma le Samoa Builder ua faaopoopo mai la latou lagolago mo le faaauauina o fusuaga Samoa Pro Am Fights i lenei tausaga.

O le alii fusu ia Pele Faumui o le siamupini o le aupaga middleweight a Samoa o loo fusu nei i Niu Sila sa tauaaoina i le faletua ia Malavai i lea afiafi mea faipele lanu paepae o loo sainia e le pulega a le Event Polynesia, faapea alii fusu o Leti Leti, Warren Fuiava, Vaitele Soi ma Pele Faumui e fai ma sui o tama fusu ua faamanuiaina ona o le sao o Aiolupotea i fusuaga.

Fetalai Teleiai, “O le lagolago a Hennie ma Pafuti e pei ona iloa ai e le toatele, o le isi lenei o tautua tāua tele mo taaloga, o le faamaopopoina o tagata tapuai i au taaalo a le atunuu e pei ona o laua taulamua ai mo le Manu Samoa, lea foi ua agalelei ma lagolago mo fusuaga.”

O le afioga ia Aiolupotea o se tagata taalo sa iloga lona taimi a o avea ma numera iva a le kalapu lakapi a Poneke, sosoo ai ma le autele a Ueligitone i le tele o tausaga.

O ia foi o le uso matua o Junior Tonu‘u sa avea ma numera iva a le Manu Samoa faapea foi ona ta’alo mo Niu Sila.

E ui ina ua tuua le Malo e le afioga ia Aiolupotea Hennie, ae o le a ola pea ana galuega lelei i le siitia ua iai nei fusuaga faapolofesa a Samoa.