E tai foliga faapena le vaai i ai i le soifuaaga o le tamaitai matua ia Anuilagi. Ona e foliga mai, o le soifuaga tonu ma le ata lea sa maua i totonu o le soifua o Anuilagi, a o feagai ai ma le galuega ma ona tiute i le falemai. O se luitau foi mo tatou uma ina ia aua le faatamala ma faatauagavale i se mea itiiti o loo i ou lima, auā e faaaogāina e le Atua le mea itiiti e tupu mai ai se mea tāua.
Manatua foi o se vavae mumū itiiti ae tutu ma tuu i luga o le tuugalamepa, e susulu atu lona malamalama ma malamalama ai tagata e toatele.
Sa fesiligia e le tatou itulau nisi o tina sa latou iai faatasi i lea vaitaimi i le galuega, i ni o latou finagalo e uiga i lenei tamaitai.
Ona o nisi o taimi e pei ona silafia e agai i luma ma toe foi i tua faamatalaga a le tamaitai ona o le matua ua iai. O le latou mau e faamaonia lava faamatalaga sa tuuina mai e Anuilagi, ma o se fiafiaga foi i nei tina ua matutua foi, ona ua latou silafia o loo soifua pea ma o loo i Niu Sila le tamaitai faigata o Anuilagi Aiono.
Ua faamaonia foi le talitonuga e masani ai le atunuu, o le tama ma le teine Samoa, e aoga muamua i totonu o le aiga, a oo ina avea ma taulealea poo se tamaitai, e mafai foi ona aoaoina mai i totonu o le fale o matai, poo le fale o tamaitai i totonu o nuu ma afioaga.
O falea‘oga ia sa amata mai ai tagata Samoa i aso anamua. A silasila foi i ai i faamaoniga, a lauga se tulafale e lē tau faitauina se api, poo se fasi pepa, ae lagi faatauloto ma usu faapese le tele o saunoaga ma fetalaiga.
O ai e mafai ona manatuaina le lavelave ma le vao filifili o upu ma tala o le atunuu, ae faapefea le mausa o failauga Samoa, o le pese i faalupega o afioaga taitasi o le atunuu? E amata mai maota ma laoa, sa‘o tamaitai, ma sa‘o aumaga, malaefono ma malae o faautugatagi a Samoa.
O upu foi ma le gagana faaaogā e lē toe tau tusitusia pe faamauina, ae lauga mai lona silafia e pei lava o se tagata sa aoaoina lelei ma iu i se iunivesite.
O le faaaogāina foi o metotia ma faiga i faaiugafai e tausi ai nuu ma afioaga, e muliga ai faaiuga a alii ma tamaitai faamasino i faamasinoga maualuluga. O manatu ia ua toe tutupu mai, ma lagona ua toe faafouina, ina ua feiloai ma faailoa le soifua galue o Anuilagi Lupe Aiono.
Ia manuia laasaga o lenei vaiaso, manuia foi le tamaitai matua i le nofoaga o tagata matutua o loo iai nei. Ia luitauina pea i tatou, ma ia manatua e tofu lava i tatou ma meaalofa mai le Atua, e galulue faatasi ina ia manuia ai tagata lautele, ae atagia ai le matautia tele ma le mataisau o lo tatou Matai.
Soifua.
