Asosi teine tuai o Pope Paulo VI i Brisbane
E moni lava ia upu a le atunuu, ‘E lele le toloa ae maau lava i le vai’. E iloa lava le Isaraelu moni o le susue o le faamalama ma silasila atu.
E lē faapitoaugafa pe manatu faapito nisi o nei Asosi poo ē sa a‘oa‘oina i aoga a le Ekalesia Katoliko i Samoa i ia aso, ae ua iai le naunau fia tautua ma saili malo auā alo ma fanau a Samoa mo le lumanai.
O le a‘e ai o se faautaga loloto ma se tofa tatala i nisi sa a‘oa‘oina i le kolisi a Pope Paulo VI, ua o se tulaga talafeagai lava lea ma le fesoasoani malosi i nai alo fai a‘e o loo tutupu a‘e i Samoa a o tau faasoasoa ai i le faaletonu o le tala o le seleni i lenei vaitaimi.
O le afiafi o le Aso Toonai, aso 19 o Iuni, sa faia ai se siva tele lava a tama ma teine tuai o Pope Paulo VI.
Na tatalaina lea faamoemoe tāua i se sauniga lotu sa taitaia lea e le afioga a Patele Epati Tamati o le pulega a le ekalesia Katoliko i Kuiniselani.
Sa faatumulia le faamoemoe i uo ma aiga ma ē sa valaaulia faapea isi Asosi a tama ma teine tuai e pei o le SMOGA, Sanele ma Sagato Iosefo.
O le aofai o le seleni na tauaaoina e tama ma teine tuai o Pope Paulo VI e tusa ma le $11,600.00 ma ona tupu.
O lea seleni o le a faasoasoa lelei auā le manaomia mai le a‘oga i Leulumoega e ala lea i sikolasipi ma fuafuaga faagasolo a le Asosi auā le alualu i luma o lenei auaunaga.
O nisi nei o le komiti sa filifilia a le Asosi a Pope Paulo VI:
Failautusi – Losalī Molī-Fernandez
Teutupe – Tili Fata-Tauilo
Sui Peresitene – Telesia Leota
Peresitene – Sitika Lemana-Satui
faatasi ma nisi tamaitai o loo i totonu o le Asosi ua ofo atu la latou fesoasoani i le tautuaina o manaoga mai le Kolisi o Pope Paulo VI i Leulumoega i Samoa.
