O lupe sa vao eseese ae ua fuifui faatasi, ua sanisani faamanuao ma ua matalupe le seuga ina ua tau lau o le faamoemoe, auā ua soo ta‘iao ma tini le uto e pei o le faiva i vai.
Ua a‘e malo le latō i le ea a le afioga i le Peresitene ma nisi o tausi matagaluega ma faletua ona o le tatalaina lea o se tasi o ekalesia e faaopoopo i Ekalesia ua iai nei o le Sinoti a le Ekalesia Evagelia Uesiliana Metotisi i Kuiniselani.
O le aoauli o le Aso Sa, aso 27 o Iuni na faia ai lea sauniga faapitoa, lea sa taitaia e le afioga i le Taitai poo le Peresetene ia Rev Vii Sione Amituanai na malaga mai Niu Sila. Sa mamalu ma paia le aso e ala i le lagolagosua a le Failautusi le susuga ia Rev Itumalae Lilomaiava.
O le Peresetene Sili o le Auuso sa faapea ona auai mai, le susuga ia Ofa Amituanai ma le failautusi o le Auuso, Tinei Lilomaiava.
O le susuga ia Rev Paulo Ieriko o ia lea o le Faatonu o Aoga Kerisiano.
O le afioga i le Sea o le faasinoti a Niu Sila o le susuga ia Rev Iosefa Maiava, ma le faasinoti a Ausetalia o loo taitaia e le Sea ia Rev Kalepo Afemata ma le faletua ia Susana Afemata.
O Rev Fenika Vasega o le failautusi lea o le sinoti a Niu Sila, ma le failautusi a Ausetalia, o le susuga ia Rev Setu Moefaauo ma le faletua ia Lemau.
E tusa ai ma le faamoemoe i le tatalaina o le ekalesia fou ua iai nei, lea ua tusiaao i ai le Atua i le susuga i le Failautusi o le Sinoti a Ausetalia, Rev Setu Moefaauo ma le faletua o le a faafaileleina agaga o le ekalesia fou.
Na faatumulia le hall a le Borough State School i Marsden i le molimauina o le tatalagalotu a le Faasinoti Ekalesia Evagelia Uesiliana Metotisi, ma o le a faamautu lava lenei aulotu fou i le pitonuu o Logan City.
Sa faataunuuina foi faaaloaloga masani ina ua mae‘a le taumafataga tele sa tapenaina auā le paia o le aufaigaluega totofi a le Atua faapea le auvalaaulia.
Tatala se isi ekalesia fou Evagelia Uesiliana Metotisi i Brisbane
E iai le faamoemoe o le vaiaso lava lenei o le a toe taliu ai le Peresitene ma nisi o tausi matagaluega ma faletua i Niu Sila. Manuia tele le galuega fou i lau susuga i le failautusi Rev Setu ma le faletua ia Lemau Moefaauo.
