Anuilagi Lupe Aiono (vaega 2)

Talofa lava Samoa! Malo le soifua manuia. Ua tatou toe feiloai i luma o le Atua i le soifua lelei ma le lagi e mamā i lenei foi vaiaso. Afai na iai ni faaletonu o lena vaiaso ua tuanai, e iai le talitonuga tatou faatuanai mea ua tea, ae tuli pea i luma so tatou ai mo le lumanai. Faamalo faapitoa mo le au faatau ma le au faitau o le tatou nusipepa, malo le lagolago, faafetai le faatau.
Anuilagi Lupe Aiono

O le vaiaso nei, o le a faaauauina ai le talaaga o le tamaitai matua ia Anuilagi Lupe Aiono, mai le afioaga o Fasitoouta.

Sa ta‘ua i le vaiaso talu ai, le matautia foi o faiga a le Atua, sa faaaogāina ai le soifua o lenei tamaitai, mai lava i lona talavaou, seia oo lava ina ua lē mafai ona toe faatino le galuega, ona o le matua o lona soifua.

E lē gata i lea, ae na faasolosolo mai ai lava ina tausia e le falemai o tagata matutua, ina ua pulapula lagoto, ma gagaifo le la o lona soifua, ma ua iu lana tautua i lona atunuu, e ala i le galuega sa tofia e auauna ai.

Soifua galue/Galuega

O le galuega faatausimai sa galue ai Anuilagi, ma auauna ai mai lava i lona talavou seia oo ina malolo litaea.

E maeu foi le matagofie o le auala sa maua ai e Anuilagi le galuega sa galue ai, o se tamaitai tausi soifua (nurse) mo le falemai i Motootua i lona foi vaitaimi. Na ta‘ua e le tamaitai matua, o ia ma lona olaga, e lei oo i se kolisi maualuga, peitai o le mae‘a ai o ana aoga i Malifa, e lē o mautinoa foi poo le ā le maualuga o lea aoga i lena vaitaimi, na maua ai lona avanoa e agai ai e galue faateine tausimai pe tausi soifua i le falemai tele a le atunuu.

O lana mau e faapea, o lena vaitaimi sa matuā manaomia tele e le pulega ma le falemai i Motototua, se aufaigaluega tausi mai, ona o le pisi ma le tele o galuega fesoasoani sa faateleina ma faatupulaia i le matagaluega. O le ala lea na maua ai ma lona avanoa e ulufale ai i totonu, ma amata ai loa ona a‘oa‘oina le galuega, seia oo lava ina maua nisi o agavaa, ma siisii ai lona tulaga i le galuega.

O le soifua galue o Anuilagi e tusa ai ma lana tautinoga, ua atagia ai o le meaalofa a le Atua i lona soifua, ona a silasila ma vaavaai i ai, e lei iai ni ona agavaa mai se aoga matata eseeese, e lei ulufale foi i nisi aoga maualuluga, aemaise o se iunivesite e aoaoina ai le poto ma le tomai sa ia mauaina. O lona uiga o le atamai ma le poto sa ia maua, o se meaalofa tuusao a le Atua i lona soifua, ma faaaogāina ai lona tagata.