O le soifua auauna atoa lava o Anuilagi e na o le tasi lava le galuega sa auauna ai, seia oo lava ina litaea malolo. Sa ulufale i le galuega faatausi soifua, ma galue ai lava seia oo ina tofia ma avea o se tasi e vaaia le umukuka atoa a le falemai, faatasi ai isi ona tofiga sa faamoemoeina ai lona tagata i totonu lava o le galuega.
E le gata i lea, ae fai lava foi si tele o isi atunuu o le Pasefika e aofia ai ma Niu Sila, sa malaga i ai Anuilagi ma galue ai aemaise ai o le fai foi ma sui o Samoa i totonu o fonotaga a le au tausi soifua i atunuu eseese e pei ona ta‘ua. E le o mautinoa foi i lana faamatalaga, le aofai o taimi sa toesea ai ma le galuega, ona o isi tiute ma fonotaga sa malaga ai i fafo.
O Fiti, Tonga, Toelau, ma le atu Malesala, faapea Tutuila, ma Niu Sila, o nisi ia o atunuu sa malaga i ai mo le tele o taimi i luga lava o pisinisi faalegaluega tausi soifua. Sa ia ta‘ua foi se fiafiaga ese sa oo i lona tagata, ina ua toe tuvae i Fiti, le atunuu sa fanau ai, mo le taimi muamua talu ona toe taliu i Samoa, ona o se malaga foi a le galuega na mafua ai.
E faapea se isi ana faamatalaga, o le mafuaaga lava e faamuamua ai lona tagata e le tele o alii fomai (doctors) sa latou galulue i lena vaitaimi, mo malaga i fafo o Samoa, ona o lona lē fefe, ma e malosi foi lana tautala, e lē solomuli foi, ae fai mea mae‘ae‘a, atoa ai ma lona ote tele, ma isi lava ona uiga sa iloa ai. O agavaa ia sa ia Anuilagi sa mafua ai ona faamoemoeina ma filifilia e le pulega e malaga i atunuu e pei ona ta‘ua, mo le faatinoina o fesoasoani sa manaomia.
Sa oo le tautua a le tamaitai matua i le tulaga o le faaeaina, ma le faaaogāina ona o agavaa ma tomai faapitoa e lei aoaoina mai i se falea‘oga, ae sa aoaoina mai i lona aiga, aemaise o se meaalofa tuusao mai le Atua.
O le poto o le mea a le Atua, o le faagaganaina foi o le pitolaau a le Atua e pei ona atagia i le soifua galue o Anuilagi. Sa fealuai ma iloa isi atunuu i fafo ese o Samoa, ona o agavaa faapitoa sa ia te ia.
O lana saunoaga sa atagia ai le faaaogāina tele o lona tagata i lea vaitaimi e ui lava ona o se tagata e lei oo i ni aoga maualuluga ma se kolisi, auā o le faitau lea faalelalolagi nei.
E toe manatu ai nisi o tusitusiga a le aposetolo o Paulo, o loo ia faaaogāina ai se fuaitau e faapea, ‘Ua filifilia e le Atua mea valea a le lalolagi, ina ia faamāina e popoto, ma mea vaivai a le lalolagi ua filifila ia e le Atua, e faamāina ai mea malolosi’.
