(E silisili pea le alofa faatina)
O le viiga lava ma le faafetai i le Atua ona o lana pule faasoifua o loo faafualoa ai pea le soifua o le faletua manumalo ia Tima Tu‘iai. O le faletua lea o le uluai toeaina o le EFKS i totonu o Brisbane.
O le vaiaso lava ua tuanai a o lumanai le Aso Toonai aso 16 o Iulai na faateia ai le susuga i le toeaina manumalo mālōlō ia Rev Samuelu ma le faletua ia Tima Tu‘iai ina ua sau se valaau o laua o le a malaga atu i le laumua o Ausetalia (Canberra). O inā sa faia ai se fiafia tele e faamanatu ai le 75 tausaga o lona soifua.
O se tasi o o la alo sa fai ma sui o le malo o Ausetalia i Fiti i tulaga tau galuega, le tamaitai o Agnes Tu‘iai Aruwafu lea ua toe taliu mai ma toe tautua lava i le malo o Ausetalia i le laumua.
O i laua nei na fuafuaina lenei meaalofa tāua, e pei ona iai le Aso Toonai ua tuanai faatasi ma le lagolagosua a le nofoaalo ma le susuga i le toeaina ia Tauaaga ma le faletua ia Reeta Mataafa. E tele lava tala ia manū ae itiiti ia mala, e ao lava ona sii le faamua ma viia pea le Atua i lona alofa matalasi.
E avea ai lenei avanoa tāua e auina atu ai ma le agaga fiafia o le nofoaalo e ala ia latou faamanuiaga ma le agaga faafetai i si o latou tina pele o Tima Tu‘iai.
“Faafetai mo lau tausiga ia te i matou i tausaga e tele. Faafetai alofa faamaoni. O le sasa i upu ma a‘oa‘oga. O le a‘oa‘i i faataitaiga lelei. O le fautua ma le alofa loloto. Sa e faafaileleina i matou ina ia matou iloa ma matata‘u i le Alii. Faafetai i lou onosai auā so matou foi faaletonu. Faafetai loto faamagalo. Faafetai tapuai ma lou nofo tatalo i aso uma.
Faamalo le tautua i le Galuega a le Atua e oo mai lava i le asō. E leai lava se isi upu e mafai ai ona gaganaina e Tamā ma i matou le fanau, ua na o le FAAFETAI, FAAFETAI, FAAFETAI tele”.
Ia faamanuia le Atua ia te oe Tinā, e ala i le faafualoaina o lou soifua i le tino, le mafaufau ae faasilisili ai pea le agaga auā tiute o loo feagai ai i totonu o aiga ma le Ekalesia pele.
O le tatalo, ia maua pea ni tausaga se tele o la tatou mafutaga, auā le tamaoaiga faaleagaga ua foaiina atu e le Atua ia te oe, e te faasoa mai ia te i matou le fanau.
Wishing you all God’s blessings and continued happiness on your 75th birthday Tina! We love you so much and thank you for everything you have done for us!!
Alofaaga e lē uma, o Tamā (Rev Elder Samuelu Tu‘iai) & lau fanau (Toto Johnston; Rev Aukilani & Mauinuuese; Rev Elder Tauaaga & Senerita Mataafa; Manulua & AnnMaree; Alapati & Savannah: Taimane & Francis Aruwafu) & grandchildren (Benjamin, Tima Johnston; Samuelu Jnr; Ipiniuesea, Tima, Taimane, Tautalafua, Sammy, Folototo, Tioata Mataafa; Luka, Rebecca Tu‘iai; Aaron, Jesse, Triahna, Samuelu Jnr I) & Tonise ‘Ava.
