E maoa‘e le tali atu a le vasega o le aufaipisinisi ma kamupani faapea le atunuu i le sailiga tupe muamua a le Manu Samoa na faatinoina i le faaiuga o le vaiaso, i le lima mafola i seleni, ae ua oo lava foi i ekalesia ua lē nofoa‘i ae ua faaali le lagolago i le sauni atu o le aulakapi tele a le atunuu i le Ipu o le Lalolagi.
O le taumafataga faalemalo sa tali faaaloalo ai le Palemia, o ia foi o le taitaifono o le Iuni Lakapi aoao a Samoa, na maua ai le silia i le ‘afa miliona tala poo se vaegatupe e tusa ma le $550,000 (limaselau limasefulu afe).
O le maota Samoa o le malae tapolo o le Faleata Gold Course i Tuanaimato sa faia ai lea taligasua o le aoauli i le Aso Faraile ua mavae.
Lea na tauaao ai ma meaalofa tupe a nisi o kamupani ma pisinisi ae na tauaao ai foi ma le meaalofa tupe a le Ekalesia EFKS, na avea ai le taitaifono aoao o le EFKS susuga Lale Ieremia ma sui e faaoo le meaalofa tupe e $50,000 afe i le taitaifono ma le komiti sailitupe a le Iuni lakapi faatina a le atunuu.
O le isi sailiga tupe o loo sosoo ai nei, o se leitiofoni i luga o le televise. O le kamupani a le Digicel ua latou foai le selau afe faapea le komiti o taaloga faitupe le Totalisator Board e selau afe foi lana foai.
E lē o faitauina i le silia i le lima selau na maua i le taumafataga o le aoauli suetupe, le vaega tupe e $850,000 ua tuuina atu e le Malo i tapenaga o le ipu o le lalolagi e pei ona faamaonia ma pasia lea foai i le tala autū o le tupe sa soalaupule e le Palemene i nai vaiaso ua tuanai atu nei.
