Ina ua maua tala o le a faaipoipo le alii o Tioni ma le tamaitai lalelei o Penina, e toatele latou te lei taliagofie lenei tala, ona faapea o latou manatu, ‘ua maimau Penina i lea mea mimita ma le fia siou.’ O nisi, ‘poo gafea lava o Tioni ua seetia ai lenei tamaitai lalelei sa tatau ona faaipoipo i se alii e pei o ia.’
Ua atili nei lagona tetee o le au fai tofa, ona sa fiafia uma i le taimi na fai ai le faigauo a Penina ma le alii aga faatamalii o Falani, ae ua leiloa lava le mafuaaga ua toe momotu faafuasei ai le loto o Penina ia Falani, ae faamaopo loa le faigauo ma le ‘fia siou’ e pei ona tau ai e fafine o le aulotu si alii o Tioni.
Ua uma le faaipoipoga, ma ua amata le aiga o Tioni ma Penina, ma e ui i le mafiafia o faitioga sa faaleo i le amatamaga mai o lenei mafutaga, ae pei lava o le tele o mataupu faapea, e mulimuli ane lava ua toe mou malie ese atu na faitioga, pe a lava papale pea ma inu le asipolō o le onosai.
O le mea moni na oo uma le tele o faitioga i si alii o Tioni, ma e ui na faanoanoa ai, ae sa ia ioe, e moni lava nei faasea uma, aua o ia o se tama, sa fiafia tele i taaga ma nisi o uiga le manuia o le tupulaga, ae atonu o le fia faiava tele ia Penina, na faafuasei ai ona faia ona suiga tetele, ae agai mai e faasiilima le fatu o le tamaitai afakasi. Na manatu Tioni, pau lava le auala na te talia ai nei lagona le fiafia o tagata i le la mafutaga, o lona galue malosi e fai lelei le la aiga ma Penina.
Na faamanuiaina le mafutaga i se alo tamaitai ua fanau mai, ma sa amata ona matauina e le au faitau laulu, le suiga tele ia Tioni, i le toaga e tausi lelei lona aiga. I totonu o le nuu, le ekalesia, ma isi potopotoga masani a le aai, e mataina ai lava lenei aiga, e fai o le lalelei o le ava a Tioni, ae o se fafine foi e atamai tele i le itu tau galuega faaofisa, lea ua maualuga ai lona tulaga i nisi o galuega, ma maualuga atu ai foi ma le alii o Tioni.
Ua le iloa lava e tagata poo gafea tonu le taimi na faafuasei ai ona toe solomuli i tua le mafaufau o le alii o Tioni, ona o lea ua amata nei ona matauina e peiseai ua toe aliali mai uiga ia sa mafua ai ona le ioeina e tagata le tuufaatasia o laua ma si fafine o Penina. Ua manatu nei le au faitau laulu, ‘lona uiga na pau lava le mafuaaga na faia ai e Tioni suiga faafuasei i lea taimi, o le fia faitoalua ia Penina, ae o lea ua maua loa le fafine ma lona afafine, toe fuli loa e fai le olaga lea e manao moni ai.’
