I le suafa o Keriso lo tatou Faaola ma le na togiolaina i tatou, e toe faatalofa atu ai i lenei foi vaega o le tatou tusitusiga o le Malamalama i le Tusi Paia.
E le faaitiitia le agaga faafetai i le Atua ona o le meaalofa sili o le Kerisimasi mo i tatou o le ola e faavavau e ala ia Keriso lona Alo Pele. Na soifua mai o ia e pei ona tatou faamanatuina nei ina ia mautinoa lou nofoaga i le ola e faavavau.
Peitai e le mafai ona mautinoa lea nofoaga vagana ai ua tatou taliaina o ia i o tatou loto ma agaga o ia o le Faaola (Ioane 1:12).
A o tatou iai nei i fiafiaga ma le faamanatuina o le soifua mai o le Mesia, ia tatou maua le loto faafetai ma le loto maulalo tatou te taliaina ai o ia i o tatou olaga, aua tatou te moomia o ia pe afai o iai so tatou faamoemoe i le ola e faavavau.
Na maea le tatou talanoaga i le vaiaso na tea nei i le faamatalaina o le Malumalu i Ierusalema ma le Anetikeriso e pei ona aoaoina e Keriso i le Mataio 24. E ui o se vaega tutotonu o le talitonuga faa-Iutaia, peitai ua puleaina nei e le talitonuga Mosalemi e oo mai i le aso.
Ole tulai mai foi o le Anetikeriso o loo manatu le toatele o ia e maua ai le filemu i le lalolagi. E pei ona tatou talanoaina le fitu tausaga o le sainia ai e le Anetikeriso o se maliega o le filemu i le lalolagi faatasi ai ma tagata Iutaia. I le ogatotonu o lenei fitu tausaga o le a ia toe faaleaogaina ai lenei maliega ma ia ave faamalosia ai le malumalu i Ierusalema ma ia faamalosia tagata ina ia tapuai atu ia te ia.
O Keriso na ia lapataia lona au soo ma i tatou uma ina ia ‘sosola i mauga pe a outou iloa le mea e inosia e faatafaunaina ai e pei ona folafola mai e le perofeta o Tanielu ua tu i le mea paia (Mataio 24:15). O loo talanoa Keriso i le Anetikeriso, ma le mea e paia o le malumalu lea i Ierusalema.
O Paulo na ia lapataia foi le Ekalesia i Tesalonia i lenei lava mea: “Aua nei faasese se tasi ia te outou i se togafiti e tasi, aua e le oo mai lena aso, seia muai ona taunuu o le tetea ese, ma ia faaalia mai o le tagata o le amio leaga o le tagata lea o le malaia, o le tetee atu ma faamaualugaina e ia o ia e sili i mea uma lava ua tauatuaina ma mea uma ua ifo i ai tagata, o lea ua tietie ai o ia i le malumalu o le Atua, peiseai o le Atua o ia, o loo faaali mai o ia, o le Atua lava o ia” (2 Tesalonia 2:3-4).
Ua fetalai le Tusi Paia e iai le malumalu i Ierusalema i ona aso e gata ai, ina ia faataunuuina mea uma e pei ona folafolaina.
O le Anetikeriso lenei o se tagata e foliga mai e lelei peitai ane o le taimi e ulutinoina ai o ia e le agaga o le Tiapolo, ona suia ai lea o ia mai se tagata lelei i se tagata e pei o Hitila, o le ia taumafai ina ia fasiotia uma tagata Iutaia atoa ai ma i latou e talitonu i le Atua.
O se vaega taua lenei o le vaitau o le soifuaga o le lalolagi ua faaigoaina o aso e gata ai. O le vaega mulimuli o fuafuaga a le Atua ma le taumafai a le Tiapolo ina ia puleaina le lalolagi.
O se aotelega lenei o mea o le a tutupu ina ia manino:
1. O le a oo le lalolagi i tulaga faigata e pei ona valoaia e Keriso i le Mataio 24. O le a faateteleina taua, o mafuie ma tulaga faapena i le lalolagi.
2. O le a faigata le tamaoaiga.
3. O le a vatau foi atunuu.
4. O le a leai se filemu e maua.
5. Ona tulai mai lea o le tagata ua igoa o le Anetikeriso ma se tapenaga e maua i le filemu. O lenei fuafuaga e saini lea i le va o ia ma isi atunuu e pei ona valoia e Tanielu mo le fitu tausaga. O lenei fuafuaga o le a faamalieina ai le toatele o tagata ma faapea ifo, ia tatou mulimuli i lenei tagata aua o ia o se tagata lelei ua tatou maua ai le filemu. O se lagona lelei peitai e le o silafia e le toatele, i le ogatotonu o le fitu tausaga e toe sui ai le mafaufau o lenei tagata ma ia faaoo ai le maliu i le toatele.
6. O le a faapea ona tulai lenei tagata i le malumalu ina ia tapuai uma atu ai tagata ia te ia. Silasila i le Tanielu 9:27; 2 Tesalonia 2:3-4.
7. O se tasi vaega autu pe taua ai lenei malumalu, ona i Ie pei ona valoia, e taunuu mai i ai Keriso i lona toe afio mai (Malaki 3:1)
O se vaitau e ese le taua lenei o loo tatou soifua ai. A tatou vaavaai i le suiga o mea o tutupu e fai lava si saoasaoa. O loo le mapu lava le vatau o atunuu i totonu o Palesitina i le taimi nei. O loo finau pea i eleele ma fanua aemaise le nofoaga tonu o le malumalu e pei ona taua ona ua avea nei ma nofoaga autu o le talitonuga Mosalemi.
Ua faataapeapeina Iutaia i le lalolagi atoa aemaise lava i le vaitaimi o Hitila. I nei ona po ua amata ona toe gasolosolo tagata Iutaia mai atunuu uma o le lalolagi e toe nonofo i eleele o Iutaia, ma o se tasi na o vaega o loo iai le vevesi.
O aso taitasi e potopoto ai tagata Iutaia e tatalo i le nofoaga tonu sa iai le malumalu o Solomona. O loo totoe ai se tasi o vaega o le pa o le malumalu lea o loo faaigoaina nei e tagata o le Wailing Walls pe a silasila i ai i taimi o tala mai nuu mamao i le TV. Ua avea o se nofoaga paia lenei pa ona e faia ai tapuaiga i aso uma.
O le a toe foi le tatou talanoaga i le mataupu e 11 o Faaaliga o loo faaulutalaina faapea, ‘Ua vavalo mai molimau e toalua’.
E tele lava manatu ma taofi eseese o i latou e aoaoina le Tusi o Faaaliga e uiga i nei molimau e toalua.
I le Feagaiga Tuai o loo iai se valoaga ia i laua o le avea ma e tomuaina pe sauniaina tagata aua le afio mai o le Mesia. Muamua o le perofeta o Elia e pei ona valoiaina e le perofeta o Malaki (4:5-6). O le tasi tagata e pei ona fetalai ai le Tusi Paia o Ioane lea le Papatiso. O ia lea na valoia e le perofeta o Isaia ‘o le leo o loo alaga i le vao’ ina ia teuteuina loto o tagata e tapena ai i le afio mai o le Mesia (Isaia 40:3).
O le manatu taatele e faapea o molimau e toalua o loo taua o Elia lava ma Ioane ona o nei le itu. O i laua nei na tapenaina le afio muamua mai o Keriso. O i laua foi nei o le a toe faia le mea e tasi aua le afio faalua mai o Keriso.
I le 11:3 o loo taua ai e faapea, “Ou te tuuina atu foi i au molimau e toalua la te vavalo ai i aso e tasi le afe e luaselau ma le onogafulu…”
O molimau nei e toalua o tagata o le a tautala atu i le afioga a le Atua. Fai mai le Tusi Paia o le umi e molimau ai i laua e tasi le afe lua selau ma le ono aso. A vaevae aso nei i tausaga ona maua lea o le tolu ma le afa tausaga. O Molimau nei faatoa tuuina mai i le taimi ina ua faaleaogaina e le Anetikeriso le feagaiga mo le fitu tausaga i le maea o le tolu ma le afa tausaga muamua. O aso o totoe o le feagaiga e tolu ma le afa tausaga, lea o le a auina mai ai molimau mo le la galuega.
Talosia e te le oo i lea taimi ae ua ave olaina uma i tatou i le siitiaga i le ea e pei ona faamalamalamaina e Paulo i le ekalesia i Tesalonia (1 Tesa 4:13).
O le tulaga lena e taua ai e pei ona valuvalusia aa o le fau i lou finagalo, talia nei Keriso manu o maua lou avanoa. Talia nei o ia o lou Faaola.
Tatou te le iloa le taimi ma le ituaso, peitai a oo mai le polokalame a le Atua ae ua tatou sauni. Ua mautinoa o tatou o tagata o le lagi aua ua uma ona tatou talia Keriso e avea ma o tatou Faaola.
Ia manuia oe ma lou aiga i lenei vaiaso.
Soifua ona o Keriso
