E faafeiloai atu i le suafa Manumalo o Keriso lo tatou Alii Faaola. Malo le soifua manuia i lenei aso. Malo foi le faapalepale ma onosai i feau ma galuega o loo feagai ai aua le tausiga o aiga ma ekalesia.
Alo maia o le faaauauina foi lenei o le tatou suesuega i le Tusi o Faaaliga ina ia mafai ona maua se Malamalama i le Tusi Paia.
O le vaiaso na tea nei na tatou talanoaina ai le taimi na iliina ai le pu lona lima a le agelu lea na vaaia ai le fetu ua pau mai le lagi ma tuuina atu ia te ia le ki o le to e le gata. Na ia tatala le to ma alu ae ai o taulaga Se akerise ma le asu. O nei se akerise e matua le foliga lava i ni se akerise e pei ona silafia o loo ola i nei ona po. Ae faitau i ai i le mataupu e 9:3-10 ona e silafia ai lea o nei se akerise o temoni lava.
I le 9:13-16 o loo vaaia ai foi le isi agelu ua ili le pu ma faapea atu ‘Tatala ia i agelu e toafa o e ua fusifusia i le vaitafe tele o Eufirate. O nei agelu fai mai ua saunia i latou mo le ituaso latou te fasiotia ai le lona tolu o vaega o tagata. E le gata i lea, e o ae e tietie i solofanua o lo latou faitau aofai e lua mano o mano poo le lua selau miliona.
O ai nei agelu o fusifusia? E iai le talitonuga o nei agelu o temoni poo agaga leaga ia. E pau lava agelu o loo saisaia pe fusifusia i le Tusi Paia, o agelu ia o le pogisa poo i latou ia na faatautee i le Atua.
E matautia le tulaga o le a oo i ai tagata. O le a matua tele le tagata oti.
Aua foi nei galo o le taimi lava lea o loo saili pea le Atua i e salamo ma foi atu ia te ia. E ui o loo matua luluti tiga ma faigata ae o loo iai lava le avanoa e salamo ai le tagata.
O le tulaga lena, e ta ai pea le logo a Masefau ina ia salamo nei aua le faatali. Salamo nei, e mautinoa ai le afio mai o Keriso e ave oe ae lei oo mai taimi o puapuaga tele. E le mafai ona e toe oti i lea vaitau aua e sola le oti e pei o upu a le Tusi. E fiu foi e fai atu i mauga e mafuli mai, ae le mafai lava ona toe oo le oti.
Ina ua ilia le pu lona ono sa faapea foi ona lagona e Ioane o leo ma nifo e fa o le fata auro o i luma o le Atua.
O le vaitafe o le Eufirate o se vaitafe taua i le Tusi Paia, i le talafaasolopito atoa ai ma atunuu o loo tafe ai lenei vai. O le vaitafe lenei, pe a silasila i le faafanua o loo vavaeina ai Palesitina i Sasae ma tafe mai i Take ma Suria ma faasolo atu i le atunuu lea ua igoa nei o Iraq ma oo atu i gatai o le atu Peresia.
O le nofoaga tonu o lenei vaitafe lea e faapea na iai le faatoaga i Etena lea na uluai pau ai le tagata ma agasala i le Atua.
O le Eufirate o loo iai nuu o loo fai ma fili o le Atua, e aofia ai Papelonia, Asuria, Metai ma Suria. Tailo i ai ae e tau iai se lagona e leiloa poo agelu nei e fa o loo talanoa ai le Tusi Paia o loo latou puleaina nei malo tetele.
Na faapea foi ona iloa atu e Ioane o solofanua. O nei solofanua e le taitai foi ona foliga e pei o solofanua i nei ona po. O isi temoni o le a toe vaaia, o loo taitaia e agelu e fa mai le Eufirate. O le a latou fasiotia foi le isi vae tolu o le lalolagi. O lona uiga pe a e tago e faavasega ua uma ona fasiotia le isi vae tolu o le lalolagi, ae o lea foi o le a toe fasiotia le isi vae tolu, o lona uiga pe a sao lau numera, o le afa o le lalolagi lenei ua fasiotia.
Ae lei iliina le pu lona fitu, e iai se taimi o le a iai sina filemu i le lalolagi. O le filemu lona lua lea i le ogatotonu o le matuitui o puapuaga. Na vaaia e Ioane le agelu malosi ua sau o ia mai le lagi. Ua ofu i le ao. Masalo o le mamalu lea o le Atua. Ua i lona ulu le nuanua. Manatua foi o le uluai nuanua na tuuina mai e le Atua, o se faailoga o lana feagaiga na faia e le toe faamalemoina le lalolagi.
O ona fofoga foi e pei o le la, o lona uiga o le a matua pupula lava toe iai ma le vevela. O foliga nei o Keriso o loo faamatalaina i le mataupu muamua. O ona vae foi e pei o le poutu afi, o isi foi ia o foliga o Keriso i le mataupu 1:15. O lona leo e pei o le tagi a le leona. E faailoa mai ai lona malosi ma lana pule.
Sa i lona aao foi le tusi itiiti ua fofola. Ua tu lona vae taumatau i le sami ma lona vae tauagavale i le fanua. Ua alaga foi o ia ma le leotele e pei o le Leona pe a tagi, ua alaga o ia ona feganavai mai ai lea o faititili e fitu i o latou lava leo.
O ai lenei agelu malosi? E iai le talitonuga o Mika (poo Mikaelu) o se agelu e ese lona malosi. (Iuta 1:9; Tanielu 12:1)
Ona toe faalogo lea o Ioane i le isi leo mai le lagi ua fai mai, ina tago ia i le tusi taai itiiti ua fofola.
Ona faatonuina lea e Ioane e tago e ai le tusi itiiti ma e aina. E oona i le manava ae suamalie i le gutu. E faapea foi le mea na tupu ia Esekielu. Na faatonuina foi ina ia aina le tusi. Esekileu 2:9; 3:1-4.
I le see atu i le mataupu e 11 o loo faapea foi ona avea pea lea taimi o se taimi e maua ai sina mapu i le laueleele ae o loo faagaoioi pea le polokalame a le Atua.
O lea ua amata ona talanoa mai le Faaaliga e uiga i le malumalu i Ierusalema ma lona uiga i le taimi o fuafuaga mulimuli a le Atua. I le Tusi a Tanielu o loo talanoa auiliili ai le taua o le taimi ma mea e tutupu ai. O vaiasosa e fitugafulu o loo taua poo tausaga e fitu.
O tausaga nei o loo valoia e osi feagaiga ai le Anetikeriso ma tagata Iutaia.
O le Anetikeriso lea na valoia e iloa i le malumalu o le mea e faatafunaina ai…… e pei ona valoia e Keriso (Mataio 24)
O le malumalu lenei o se vaega taua tele i tagata Iutaia ma lo latou faatuatuaga.
O le feagaiga taua tele i tagata Iutaia aua o le a faia se maliliega e le AnetiKeriso ma Iutaia ina ia toe fausia le malumalu i le nofoaga na iai muamua. O le nofoaga lea o loo iai le fale Tapuai ua taua o le Fale Tapuai o Omar, o le tapuaiga Mosalemi.
O le a faia e le Anetikeriso se feagaiga ina ia mafai ai ona faaleagaina lenei malumalu i le nofoaga o loo iai nei ma toe fauina ai le malumalu o Ierusalema.
O le nofoaga lea sa iai le malumalu o Esera lea na umusaina i le 515BC, sosoo atu ai ma le malumalu o Solomona lea na faaleagaina e Nepukanesa i le 586 BC. Na sosoo atu ai lea ma le malumalu o Herota.
Ia fesoasoani mai pea le Alii.
Soifua
