E oo foi i si fafine o Penina, ua fai lava si ona maofa i uiga o lona toalua ia ua aliali nei. Ua pei o aga a le tama e leai se toalua, aua a alu lava e tafao, toetoe a le toe alu ane i le fale, pe tolotolo ane foi ua ao, ae pasese lava i lana galuega. E oo foi i taimi e iai uma lenei aiga i le fale, e pisi solo lava si fafine o Penina i le tapenaina o mea ma tausi si ana tama, ae o le mausa lava o Tioni, o le faasaga i le TV ma faamaeaea uma ata o alaata eseese.
O nisi o fafine o le nuu ma le ekalesia, e toetoe lava oo a latou tala ia Penina i le faavalevalea ma le sese o lana filifiliga, lea ua misia ai lona toalua lelei sa tatau ona iai, le alii o Falani, ae o lenei ua pologa fua ma tigaina i lea tamaloa le alofa. E mautinoa sa iloa uma lava e Penina faitau mafaufau o fafine, ma e ui e le faaleo atu ni ona lagona, ae i le matau a tagata, e foliga ua toe salamo Penina i lana filifiliga na fai, ae ona o se fafine e ese le uiga tausaafia, e le mafai ai ona ia faaalia lena salamo i luma o tagata.
Ua alualuai pea uiga faalekeakea nei o le tamaloa o Tioni, ae onosai pea si fafine ma tausi si ana tama. Atonu i le manatu o Penina, poo a lava vaivaiga o lona toalua, ae o uiga lava e iai i tamaloloa uma, o le mea sili o loo vaai atu pea i le tino o lana tane i aso uma a o lei moe i le po.
O nisi taimi e taumafai Penina e faasasasasa atu ana faamatalaga i lona toalua i nisi o mea e le o fetaui i lana vaai, ae o ina e vaai ai e Penina, e tee tele ma le fiafia le tamaloa pe a tau lagalaga atu se mataupu faapea. Ona toe tuu mālie lava lea e le fafine, ma o lona alofa faavalea lea i lana tane, ua malie ai lava e onosai ma aua le soona faamamafa ia te ia uiga faaletonu o le tamaloa.
Ae paga lea, na pei e sunui e se tasi i se pelu maai le fatu o si fafine, ina ua faafuasei ona faatepa o ia i se mea atonu lava sa tau sāua muamua i lana faalogo i tala feaveai, ae o le alofa tele o Penina i lona toalua, na musu ai e talia ma talitonuina na tala. Ua salamo le fafine, sa tatau ona ia amanaia faailoilo lapatai ia sa tau vavala mai, ae na moeiini i ai ona mata. A o lenei la ua matua vaaitino ona mata, ma manino atoatoa i lona mafaufau, e le o faamaoni lana tane i le la tautoga o le faaipoipoga.
