O ai e ono siamupini i le Pool B? O le fesili lea o loo tulai mai i le taamilosaga a le Aukilani Samoa i le vaega lua poo le Pool B. O ‘au o loo pito i luga o le ‘au mai Vailele le G-Mana Vailele ma Tama o le Mau mai Vaimoso lea e lei iai ni faia’ina talu ona amata le taamilosaga.
O le Round 4 lea o le a alu i le Aso Toonai nei, ae o le avanoa lea o le a iloilo ai ‘au nei e lua le G-Mana Vailele ma Tama o le Mau mai Vaimoso i luga o le malae poo ai o laua e malosi ma nofo mai i le numera tasi i le latou Pool. O le taaloga a Tama o le Mau i le Aso Toonai na manumalo ia Nations i ‘ai e 31 i le 21 a le Nations, o se taaloga mataina lea taaloga i le 80minute ona sa taufai malolosi uma ‘au e lua, ma e feauaua’i foi le laasia e ‘au o le laina sikoa.
Peitai o le laina i tua a Tama o le Mau sa faafaigata ona puipui e Nations ona e laiti tamaiti toe taufetuli ma o lea sa tele ai ina maua avanoa o Vaimoso e laasia ai le laina sikoa.
I le taaloga a le G-Mana Vailele ma Falefa na fai si faigata ia Vailele ona puipui le malosi o le laina i luma a Falefa, ma e ta le ‘afa o le taaloga o loo sili ‘ai o Falefa i le 19 i le 17 a Vailele.
O le ‘afa lona lua na toe suia atoa ai le game plan a Vailele ina ia mafai ona latou osofaia le malosi o Falefa.
O le 3 mainute talu ona amata le ‘afa lona lua o le taaloga ae laasia loa e G-Mana Vailele le laina sikoa i le latou numera 13 ma suia ai ‘ai o le taaloga. Na toe sosoo isi ‘ai a G-Mana Vailele ma see atu ai i le 30 i le 26 a Falefa ina ua toe laasia e Falefa le laina sikoa i minute mulimuli o le taaloga.
O le Pool A o looo saofai mai ai le Mount Forts Brothers i le numera tasi e lei iai se latou faia’ina i le talita, sosoo atu ai ma Faleula e lei iai foi se latou malolo.
O le vaiaso nei o le a lui ai e le United Brothers Seki Works le talita o loo umia e Mount Forts Brothers.
O le iuga o taaloga i le vaiaso ua mavae:
Tama o le Mau 31 vs Nations 21
Apia Maroons 33 vs Iva 36
G-Mana Vailele 30 vs Aai o Fonoti le Tupu 26
Tama o le Moatoga 16 vs United Brothers 30
Marist OB 0 vs Saleimoa 87
Laumua o Tumua 14 vs Sataoa 24
Mount Forts Brothers 38 Salevao Nofoalii 27.
