Na logo mālie i le faalogologo a alo ma fanau o le afioga o Vailele, o ē ua latou tauaveina le igoa o le afioaga i le taamilosaga lakapi a le Aukilani Samoa, le saunoaga a le susuga i le faafeagaiga ia Rev Lale Peteru e faapea, o le togiga e iloa ai le tagata, ma le mea e iai le tagata. A’o lona faalauteleina i le loto o le tagata Samoa, o le togiga e iloa ai le tagata ma lona faasinomaga. O le saunoaga lea a le susuga i le faafeagaiga na ia faamamafaina ai le autū mai le afioga Paia a le Atua i le tusi a Efeso i le tāua o ofu tau atoatoa, e ofu ai le tagata tau poo le tagata taalo. 

O le tatalaina o le togiga fou a le ‘au a Vailele ua faaigoaina nei o le G-Mana Vailele, na tumutumu ai le kalapu a Otahuhu Rugby Club i alo ma fanau a Vailele faapea le mamalu o le auvalaaulia sa molimauina le taumafaiga a tamafanau o le afioaga e ala i le togiga fou auā le latou ‘au i lenei tausaga.  

Na maualuga ma matagofie le faatasiga i lea po, ona sa auai le afioga i le Konesula ia Faolotoi Reupena Pogi, o le afioga i le peresetene o le iuni lakapi a le Aukilani Samoa ia Tapuai Siaosi, o Mataafa Moe, o le afioga ia Aiolupo John Roache, faapea susuga i Faafeagaiga o le afioaga o Vailele ia Rev Lale Peteru sa taitaiina le polokalame o le afiafi i le sauniga lotu, o le afioga i le Sea ia Rev Suivaaia, ma le susuga i le faafeagaiga ia Moe, aemaise ai le afioga ia Samoa Lio.

O le tele o lima e māmā ai se avega, o le tasi lea auga o aute o loo malosi ai le aulakapi a Vailele i le taimi nei ona o le galulue ma le tutu faatasi o alo ma tamafanau o Vailele o loo iai a latou pisinisi e lagolagoina ai le ‘au o loo ta’u ai le igoa pele o le afioaga.

  O le afioga i le aloalii ia Galumalemana Tai Galumalemana ma lana auaunaga o le G-Mana Wholesale Autos ma lona aiga o loo taulamua i le faamaopoopoina o lenei togiga ae o loo galulue faatasi ai ma le tautua a Evelina, Yappa Panel and Paint, ma le The right painters. O le mālie o le saunoaga a le susuga i le faafeagaiga ia Rev Lale Peteru, na ia toe fafagu ma faamanatu mai ai i tupulaga o Vailele ua iai i le taimi nei le tupulaga matutua sa iai le nuu i la aso i le talenia ma le taumafai e faamaopoopo pea taaloga auā le igoa o le nuu. 

O Vailele o le tasi lea o nuu i Samoa e talenia ana tamafanau i taaloga aemaise ai o le saili malo o ona tagata i pisinisi e pulea lava e latou. Mai le augatupulaga matutua sa iai i la aso sa talenia lava tamaiti i soo se taaloga e pei o le kirikiti, lakapi ma le voli, e o faatasi lava tupulaga tama ma tamaitai, ae o lea e oo mai lava i le taimi nei o loo faaauauina pea e alo ma fanau o Vailele le igoa o le nuu i taaloga, ua lē gata i Samoa ae o lea ua oo mai i atunuu i fafo.

O le saunoaga a le afioga ia Galumalemana Tai Galumalemana na ia faafetai ai alo ma fanau o Vailele o loo iai a latou kamupani i le tuuina atu o latou tau’au e lagolagoina ai le ‘au a le nuu, na ia tauaaoina foi le ofu (jersey) i le tautua a Evelina e fai ma meaalofa a le ‘au e talimasineia ai le lagolagoina o le togiga fou. O le saunoaga autū o le afiafi na momoli ai le faafetai a le afioga i le Konesula i alo ma tamafanau o Vailele i le faamaopoopoina o mea lelei auā le ta’uleleia o le igoa o le nuu, ua lē gata i taaloga ae ua oo foi i kamupani ma pisinisi o loo galulue ai nisi o fanau, faatasi ai ma lana faamanuiaga mo le ‘au mo ana taaloga i lenei tausaga.

O Vailele o le tasi lea afioaga sa iai i le amataina o le Aukilani Samoa, ona alualu lea, o i Counties Manukau ma faaauau ai le ‘au, lea sa siamupini mai ai. 

Ona mālōlō lea e lei toe faia se ‘au, peitai e lē mafai lava ona nanāina le taleni a le afioaga i taaloga, ma o lea ua toe lalaga ai le ‘au i lenei tausaga ma ua tulai mai ai le ‘au a Vailele o se tasi o ‘au malosi i totonu o le taamilosaga a le Aukilani Samoa. Ua tolu nei vaiaso talu ona amata le Aukilani Samoa ae ua sosoo ai foi ana manumalo e leai se faia’ina.