Ua ta’u e Egelani le sese o Aialani i le taaloga tapena mo le Ipu o le Lalolagi. E uma le taaloga e 57 ‘ai o Egelani i le na’o le 15 a Aialani. O se tulaga mataga lea mo Aialani. E lei mamao nei le malosi o le ‘au a Aialani i taaloga lakapi o le lalolagi na numera tasi ai, toe faalua ona faia’ina ai le All Blacks lata mai nei, o Novema o le tausaga na tea nei na faia’ina ai le All Blacks ia Aialani, ae manumalo le All Blacks ia Egelani. Ae o lea ua faia’ina faapea Aialani ia Egelani i ‘ai e tele. 

O le alii Samoa o Manu Tuilagi na maoa’e lana taalo. Na taalo Tuilagi i le numera 13. E ui na malosi le ‘au atoa a Egelani ae o Manu lea ua viivii e tusitala lakapi uma a Europa ma Egelani. 

E tasi le sikoa a Tuilagi na maua a’o lana taalo na fafaga ai le laina agai i osofaiga a le ‘au. E matautia. Ua toe foi ai le alii lakapi i se tulaga maoa’e talu ona muai taalo mo Egelani i le 2011 ae faato’a 20 ona tausaga. 

Ae ua matua ane lava Tuitaasaualii Manusamoa Tuilagi ma faapena ai foi  ona tulaga maualuga lana taalo. O le suafa matai lea, Tuitaasaualii na faaee e le afioaga o Fatausi ia Manu i se taimi lata mai. Na ta’ua e le tina o le alii lakapi i le talanoaga ma le Samoa Times, na o atu lava le afioaga i le isi aso ma faaee ia Manu le suafa lea, o se suafa e tāua tele i le afioaga o Fatausi ma Safotulafai. 

Ae ua mae’a foi ona faaee ia Manusamoa le suafa Lauaki, lea o loo suafa ai foi lona uso matua o Fereti. O suafa tāua uma o Salafai lea ua tauave e Manusamoa i le 28 o ona tausaga. 

O se tulaga lelei tele mo Egelani ma ana tapenaga mo Iapani. Aemaise ai le toe foi o Tuilagi i le atoatoa o lona malosi ma le saoasaoa. E ui sa natia e ia isi tulaga o ona manu’aga ma misia ai e ia le Ipu o le Lalolagi 2015, ae ua iva nei taaloga sosoo a le alii mo Egelani 

E lē na’o Tuilagi le Samoa na sikoa i le taaloga, na sikoa foi Bundee Aki mo Aialani. E na’o le lua sikoa a Aialani lea na maua ai e Bundee le isi se sikoa e tasi. 

England 57 (Tatao: Tulagi, May, Daly, Kruis, Cowan-Dickie, Itoje, Curry, Cokanasiga; A’a Farrell 6, Ford 1)

Ireland 15 (Tatao: Aki, Larmour; A’a, Byrne 1)