Afioga Minisita o le Samoa Airways, Lautafi Fio Selafi Purcell; CEO o le Samoa Airways, Tupuivao Seiuli Alvin Tuala, Afioga Tuia Paepae Letoa o se tasi o sui auai o le Komiti Faafoe a le Samoa Airways, faapea le Pule Sili o le Malaevaalele i Brisbane ma nisi o le aumalaga mai Samoa

Afioga Minisita o le Samoa Airways, Lautafi Fio Selafi Purcell; CEO o le Samoa Airways, Tupuivao Seiuli Alvin Tuala, Afioga Tuia Paepae Letoa o se tasi o sui auai o le Komiti Faafoe a le Samoa Airways, faapea le Pule Sili o le Malaevaalele i Brisbane ma nisi o le aumalaga mai Samoa

Ina ua logotala  le mamalu o Samoa i se faatalanoaga e malaga mai ai le faaauluuluga o le Samoa Airways ma afea le aai nei i le po o le Aso Gafua 3 o Setema, na vaaia le toatele o i latou sa auai atu. O ni fesili  sa lāgā i le fia manino, “O afea? Faamata e pa’ū ma iai se faamāmā avega o pasese?” Na tali uma i lea afiafi.

Na auai le aufaigaluega totofi a le Atua, taitai o ekalesia, faauluuluga o le mafutaga Tuufaatasi a Samoa i Kuiniselani, aufaipisinisi faapea tagata lautele, ua o se tufi taufaoina lava o se manuia lē ‘au maua, e ala lea i le fia maua tonu o le ‘au o le paipa.

O lea faatasiga sa tauaofia ai le atunuu i le 6 i le afiafi i le hall a le matagaluega SISDAC (Samoa Independence Seventh Days Adventist Church) i Bellbird Park.

Na muai siitia le faafetai i le Matai Sili i le lagi e ala i se sauniga lotu puupuu, sa taitaia e le taitai o le matagaluega SISDAC susuga ia Pr Misa Luao Matai’a.

Na faatulima le Failautusi  o le mafutaga Tuufaatasi a Samoa i Kuiniselani, Le’apai Vaa II e faafeiloaia le afifio mai o le atunuu ona lafo lea i le aumalaga se’i tatala mai le ‘avei i le ‘auga o aute na malaga mai ai.

Susuga i faafeagaiga, Faauluuluga Mafutaga Samoa Tuufaatasi i Brisbane, aufaipisinisi, mamalu o Samoa ma le aumalaga a le Samoa Airways i le feiloaiga sa faia i le Hall a le SISDAC QLD

Susuga i faafeagaiga, Faauluuluga Mafutaga Samoa Tuufaatasi i Brisbane, aufaipisinisi, mamalu o Samoa ma le aumalaga a le Samoa Airways i le feiloaiga sa faia i le Hall a le SISDAC QLD

O le Minisita o kamupani vaalele a Samoa (Samoa Airways), Hon Lautafi Fio Selafi Purcell sa faalauteleina vaega uma i le aso, masina faapea le taliiina o fesili a le atunuu. E lē o toe po se lilo ua mae’a ona faaailoa faalauaitele le uluai malaga a le vaalele a Samoa Airways mai Brisbane o le a amataina lea i le aso 13 o Novema ma ua fuafua o le a lua malaga i le vaiaso mai Brisbane i Apia, Aso Sa ma Aso Lua, faaaogāina ai le vaalele ituaiga 737- 800.

Na logomalie saunoaga uma i lea afiafi ma ta’ua ai se uluai malaga faataupou a le Samoa Airways i se aso lata mai ae lei amataina aloaia ana faigamalaga tuusa’o atu i le va o Brisbane ma Apia i Samoa.

E lē tutusa uma finagalo o tagata Samoa e pei ona molimauina i lea afiafi, ma o le filifiliga fai toatasi  i le loto o le tagata lava ia poo Sasa’e poo Sisifo ae ao lava ona vili tonu le ifi a Maina. E ui lava la i finagalo faaalia ma fesili fetalia’i sa lūgā ma lālō, fefiloi ai lagona o lea afiafi ona o tala aave e le savili, ae na to’a lava le afioga i le Minisita ma le aumalaga, ma momoliina mai ni tali faamalieloto i le fia mautonu o le aofia. Na taualuga ma faaiu manuia,  autasi finagalo ma olioli fiafia tagata uma ina ua faaailoa mai o le a pa’ū pasese a le Samoa Airways nai lo isi vaa o loo femalagaa’i i le va lea.

A’o tālia le aso 13 o Novema, ua amata tapisa foi tagata ma magamaganū, o se uluai taimi lenei o le a tu laueleele ai i laufanua o Brisbane se vaa a Samoa lava ia, ae pe faape’i mai. O nisi ua tuai na amata lea faigamalaga, auā o le mea moni faatoa talitonu lava Toma ina ua vaai.

Na  faaailoa mai ua mae’a ona fai sainigalima a le Pule Sili o le Samoa Airways CEO Tupuivao Seiuli Alvin Tuala, ma le Pule Sili o le malaevaalele faavaomalo a Brisbane, Gert-Jan de Graaff a’o lei usuia le fono ma le atunuu i Brisbane.

O le fono i lea afiafi sa auai mai ai le sui o le malaevaalele a Brisbane, Denise Brown (Aviation Business Development Manager Airline & Retail Management) faapea Lydwina Nio (Business Development Manager NSW), e le gata i lea o nisi o le aumalaga sa malaga faatasi mai i lea afiafi.

E toatele  le mamalu o Samoa o afifio ma alala i Brisbane, poo le ā foi le taugata o le soifuaga aemaise o pasese ua lē maua i se vaapopo ae a logoina loa ni faalavelave tutupu mai aiga i Samoa, e lē faafiti lava le Samoa e saili se seleni ma se pasese ma malaga atu e fia auai, e lē gata o tagata lautele ae faapea foi ekalesia, faalapotopotoga ma tagata tafafao ona o piitaga ma tagata Samoa.

O le malaevaalele faavaomalo a Brisbane o se tasi lea o malaevaalele pisi e faitauina le au atu i le 23 miliona tagata femalagaai talu mai le tausaga e 2017, ausia le 32  malaga faavaomalo (International) ma le 52 malaga i isi setete o Ausetalia (Domestic).

E molimauina le toatele o tagata malaga mai Niu Sila, Samoa ma isi atunuu ma momoo e  fia  avea Brisbane e fai ma nofoaga tumau i lenei olaga ona e manaia lona ea, mautu ma maopoopo faatasiga a Ekalesia, faalapotopotoga ae faitauina foi le toatele o alo ma tamafanau a Samoa saili malo i pisinisi auā le atinaeina o aiga i fafo aemaise o le atunuu pele i Samoa.

Na taliga fia faalogo le faafofogaaga a le toatele o Samoa i lea afiafi i saunoaga a le Minisita faapea le aumalaga, ona faaiu lea i le taumafataga tele sa saunia e le matagaluega SISDAC ma le paia i le aufaigaluega a le Atua. Na momoli le agaga faafetai o le aumalaga i le atunuu sa auai faapea le aufaigaluega paia a le Atua.

Matagofie foi faafiafiaga o lea afiafi, faapea faaaloaloga sa faliu ma ma’ama’au iai le aumalaga mo le susuga i le taitai ia Pr Misa Luao Matai’a faapea le matua fetalai ia Le’apai Vaa II sa fai ma fofoga o Samoa i lea afiafi a’o faamaepaepa le paia o le atunuu faapea le matagaluega SISDAC.