Sanele Mao

Sanele Mao

O le vaiaso na tea nei na faagasolo ai taaloga a le faalapotopotoga siisii uamea mamafa a le atunuu poo trials e sailia ai sana ‘au malosi e tausinio ai i taaloga siisii uamea mamafa a le lalolagi lea e faia i le masina fou o Oketopa. O le ausiisii a Samoa ua filifilia e aofia ai Iuniarra Sipaia, Nevo Ioane, Petunu Opeloge, Koliata Petelo ma Sanele Mao.

Ta’ua e le Peresetene o le faalapotopotoga siisii uamea mamafa a le atunuu, Tuaopepe Jerry Wallwork, o i latou e toalima ua filifilia nei, e tele avanoa e mafai ona manumalo ai se isi o i latou ise pine mai i lenei taamilosaga tele a le lalolagi.  E toatolu nisi o sui talavou o loo iai i le nofoa o le ‘au faaleoleo e aofia ai le tamaitai ia Sekolisitika Isaia, Feagaiga Stowers ma Don Opelone, e lei mafai ona tauva ai Opeloge i trials lea na faia talu ai ona sa faamanualia peitai e tele le avanoa mo lea alo talavou o le atunuu e tauva ai i le masina fou.  O le taamilosaga tele a le lalolagi lea e faia i le masina fou e silia ma le 100 atunuu o le a auai ai o latou sui e aofia ai ma Samoa, peitai e faalagolago le tausinio o Samoa i lea taamilosaga pe afai ae talia le talosaga a le siisii uamea mamafa ua tuuina atu i le Malo mo se seleni e faatupe ai lenei faigamalaga ona e fai si taugata tele, saunoa Wallwork, e mafai lava ona faatupe e le latou faalapotopotoga, peitai e na’o le toalua i latou e mafai ona gafatia le malaga ae afai ae maua mai se fesoasoani tau taupe i le Malo, o le a faafaigofie loa le malaga uma ai o i latou nei e toalima. Ae afai e le maua mai se tupe mai le Malo, o lona uiga e le taunuu se latou malaga. Fai mai Wallwork, o le tāua o le taamilosaga siisii lenei a le lalolagi, e tapena mamao iai le ausiisii a Samoa mo taaloga a le Olimipeka i le tausaga e 2020.

E ese mai iai latou nei e toalima ua filifilia le isi sui e toatasi ia Lesila Fiapule ua tofia foi e fai ma sui o Samoa mo taaloga a le Youth Olympic lea e faia i le Malo o Argentina i le masina fou o Oketopa. O loo maitauina pea le faagasolo ai o koleniga a le siisii uamea mamafa i aso taitasi, e le gata i taamilosaga faavaomalo o loma nei ae faapea foi le tapena mamao atu mo taaloga a le Pasefika lea e talimalo ai Samoa i le masina o Iulai o le tausaga fou. Na faamanino foi e Tuaopepe, o le taaloga lenei o le siisii uamea mamafa e manaomia lava le koleni i aso uma, o le mafuaaga foi lena e tele ina maea mai nisi o taamilosaga tetele e auai ai alo ma fanau siisii, e le umi se taimi e malolo ai ae toe amata foi koleniga.

O le taaloga lenei o le siisii uamea mamafa ua tele faaiuga lelei ua maua mai ai i le tele o taamilosaga tetele a le lalolagi na mafai ona tausinio ai, e iai foi le talitonuga o le alii faiaoga ia Tuaopepe Jerry Wallwork, e tele foi se lumanai manuia mo soo se tama ma se teine Samoa i le taaloga lenei pe a fua atu iai latou na maua faamanuiaga tau tupe mai i lenei taaloga. E tasi lava le faafitauli o feagai pea ma lea taaloga, o le utiuti ai o le faasoa i le itu tau seleni, faatasi ai ma le leai o se fale koleni mautu e faagasolo ai a latou koleniga faatusa atu i le fale laititi o faia ai nei a latou koleniga i Tuanaimato.