O le faaiuga o le vaiaso ua mavae na faataunuuina ai le taamilosaga lona fa o le Aukilani Samoa, ae o loo maitauina ai pea ‘au e fa pito i luga e lei faiaina lava a latou taaloga talu ona amata mai le taaamilosaga o le Aukilani Samoa, le United Brothers, Saleimoa, Seki Works Mount Fort Brothers o loo latou umia le talita faapea ai ma le Laumua o Tumua.
O le Laumua o Tumua o le tasi lea ‘au ua leva i totonu o le taamilosaga lenei o le Aukilani Samoa, ae soo se tausaga lava e maitauina lava le agai pea i luma o taumafaiga a le Laumua o Tumua i le faatinoina pea o lenei taaloga, e afua lea i lona saili avanoa pea i sailiga siamupini poo ‘au e fa pito i luga i le semi-final i le tele o tausaga faatasi ai ma lona umia o le siaumupini ma le talita a lenei foi iuni lakapi a Aukilani i nisi o tausaga ua mavave.
E talu mai ona faagasolo le iuni lakapi a le Aukilani Samoa o loo ausia pea e le ‘au a le Laumua o Tumua le maualuga o ana sikoa o loo mauaina i le taaloga lea e silia i le fa sikoa o loo mauaina poo le sili atu foi, e faatusatusa lea i ai o loo ia mauaina i le tele o ana taaloga ua mavae lea e silia i le tai lima sefulu ‘ai ma le tai fa sefulu ‘ai o loo ia mauaina i le taaloga e tasi.
O lana taaloga muamua o le taamilosaga na taaalo ai le Laumua o Tumua ma Faleula lea e 43 ‘ai a le Laumua i le 6 a Faleula, lona lua o ana taaloga na iloga ona malolo ai le ‘au a Vaimoso i le 5 o latou ‘ai i le 51 ‘ai o le Laumua o Tumua, o lana taaloga lona tolu na taaalo ai ma le Auckland Reds na matuā faamo’amo’a ai foi e le Laumua i le 47 o latou ‘ai i le 17 a le Aucklands Reds.
I le vaiaso ua mavae na taaalo ai loa le Laumua o Tumua ma le ‘au a le Nations o se tasi o ‘au malosi a le Pool B ma le taamilosaga lenei a le Aukilani Samoa ua leva foi ona auai i le iuni lakapi. O le Nations e lei iai foi se latou faiaina talu ona amata mai le taamilosaga i lenei tausaga e tutusa lelei ma le Laumua o Tumua, ae o le taaloga i le vaiaso ua mavae na fetoai ai le malolosi o ‘au nei e lua i luga o le malae e saili ai poo ai e tulaga muamua ao fai foi e tulua. I le amataina o le taaloga na faafetoai ai e le Laumua o Tumua le lapopoa o le laina i luma a le Nations ma le latou laina i tua i le pasipasi o le polo e tama taaalo e pei lava o le taitoafitu a le Manu Samoa, auā e lei iai se mafaufau o le Laumua o Tumua e mafai ona latou osofaiina le lapopoa o le ‘au a le Nations. O le ata faataoto na tusia i mafaufau o tama taaalo a le Laumua o Tumua i le ‘afa muamua o le taaloga na mafua ai ona ausia e le latou uigi numera 14 le laina sikoa a le Nations i le sefulu minute talu ona amata le ‘afa muamua, ma sa manuia foi le kiki i le pou a le alii o Pesamino.
Na toe sosoo isi sikoa faaopopo a le Laumua o Tumua i le ‘afa muamua e le latou prop numela tolu, faapea le numela 12 ma le latou numela sefulu. E ta le ‘afa muamua o le taaloga o loo 24 ‘ai o le Laumua o Tumua i le 7 ‘ai a le Nations, i le ‘afa lona lua o le taaloga na suia ai le game plan a le Nations i totonu o le malae e ala lea i le faaaogāina o le mamafa o lana laina i luma, ae pagā lea e lei tuumāmāina lava e le Laumua o Tumua le taaloga.
E mae’a ane le ‘afa lona lua o le taaloga ua 31 ‘ai o le Laumua o Tumua i le 19 a le Nations. Ma o se taaloga mataina lea taaloga i le faaiuga o le vaiaso, ma ua manino mai ai foi le toe see foi i luga o le sa o le Laumua o Tumua e faatalitali ai le laua taaloga ma le Marist OLB i le taamilosaga lona lima a le Aukilani Samoa i le faaiuga o le vaiaso nei.
O loo taumate foi le tele o lagona o tagata matamata i lenei tamilosaga e ono toe ofi foi le Laumua o Tumua i le sailiga siamupini a le Aukilani Samoa.
Iuga o Taaloga Round 4
Saleimoa 32 Apia Maroons 17
United Brothers 60 Aucklands 5
Laumua o Tumua 31 Nations 19
Laulii Lions 27 Nofoalii 20
Faleula 31 Vaimoso 25
Iva 42 Tama o le Lava27
Seki Works Mt Fort Brothers 33 Tama o le Moatoga 15 toe tumau le talita
