O le asiasiga a le afioga i le Minisita o tagata atu motu o le Pasefika ia Hon Aupito Su’a William Sio i nisi pitonuu o Niu Sila e pei o Dunedin, Invercargill, Timaru, ma isi pitonuu i tua e ese mai nuu nei, i polokalame a le malo, ma ia iloaina ai le faitau fia selau o tagata Samoa o loo mafai ona nonofo i totonu o nei foi pitonuu o Niu Sila.
I le finagalo o le afioga i le Minisita, ua toatele tagata Pasefika o lea ua agai ma nonofo i totonu o nei vaega o Niu Sila ae o loo numera tasi ai lava Samoa, ae o tagata nei o tagata na manumalo mai i Samoa i le Se’i poo le Quota. Ua lē gata la i le faatupulaia o tagata Samoa i nuu nei i tua ae o le faatupulaia foi o fanau aoga i totonu o aoga. O le tele o aoga i nuu nei i tua, o loo aifilofilo ai lava ma fanau aoga Pasefika ae o loo toatele ai lava fanau Samoa.
I le tāua la o le malaga taamilo a le afioga i le Minisita ia Hon Aupito Su’a William Sio i totonu o nuu i tua nei o Niu Sila ma ua ia maitauina ai le tupu ma ola o tagata Samoa i totonu o nuu nei, ma e lei iai se manatu e ono oo iai ni tagata Pasefika aemaise lava ia Samoa.
I totonu o Niu Sila, e ta’u loa tagata Pasefika e tasi lava le manatu o tagata e maua lava na’o Aukilani, Ueligitone ma Kalaiesetete ae leai la, o lea ua oo foi i nuu nei i tua tagata Pasefika, e maua ai tagata Samoa, Tonga, Tuvalu, Fiti ma tagata Kiripati. O le feiloaiga la a le afioga i le Minisita ma tagata nei o le Pasefika i nuu nei, o loo aumai ai so latou manaoga i le afioga i le Minisita o tagata atumotu o le Pasefika e manaomia se lagolago a le malo i le faatāuaina o le aganuu ma le gagana i totonu o pitonuu nei o loo nonofo ai. Ua fai foi a latou festival, e pei o Invercargill o loo fai le latou festival ae o loo taulamua ai lava Samoa.
O le lagona o le minisita ua tele le faatuputupulaia o tagata Samoa i Niu Sila, ae o loo tele foi le manaoga o loo tuuina mai e ono manaomia ai le fesoasoani a le malo. O le faavae lava o manaoga nei o mea tau fale, tupe maua, o mea tau i aoaoga. Ma ua ia nofo sauni foi e saili ni auala i le malo e ono tali ai le manaoga nei o tagata Pasefika.
Lea foi ua ia maitauina i lana asiasiga lea, o le matagaluega o tagata atu motu o le Pasefika e laititi le matagaluega ma e lē o lava foi le aufaigaluega, ma ua mae’a la ona talanoa i le pule o le matagaluega o tagata atu motu o le Pasefika e tapena ni faamaumauga e tuuina atu i le malo ina ia lagolago mai le malo ia lava faaaupegaina le matagaluega, mo le tuputupu a’e o tagata nei o le Pasefika. O tagata Pasefika e lē na’o Aukilani, Ueligitone, ma Kalaiesetete o loo aumau ai, ae ua soo uma vaega o Niu Sila i tagata Pasefika ae toatele ai lava Samoa.
