Tamaitai ia Pese Iuli mai le Auckland University ma le susuga ia Papalii Fuiavailili Alailima

Tamaitai ia Pese Iuli mai le Auckland University ma le susuga ia Papalii Fuiavailili Alailima

O le faasoa a le tamaitai Samoa mai le Iunivesite a Aukilani ia Pepe Iuli faatasi ai ma nisi o tamaitai Tonga e toalua i le Aso Faraile ua mavae i le polokalame a le Pasifika Ola Lelei Services i totonu o le taulaga faatau i Magele, na latou taulogologo ai ma faamanatu i tagata aemaise lava i mātua le tatau ona faatāua lelei o latou tiute faamātua i totonu o aiga.

Na mafua ia manatu i fanau aoga nei, ona ua latou iloa o le fiafia o tagata ma mātua i taaloga faitupe i le taimi nei, ua tauau ai ina galo ma lē faataunuuina o latou tiute ma galuega i totonu o aiga ma ekalesia ona ua tosina i taaloga nei.

O molimau a le fanau, e lē o afaina i latou i taaloga poo latou faia foi nei taaloga ae o le aafiaga o latou ona o latou aiga o loo fiafia e taaalo ai i taaloga nei.

O le aafiaga la mo fanau, a oo ina fiafia le matua i taaloga faitupe, ua misi atoa ai se taimi o fanau ma mātua, ma ua tauau ai ina lē lava le faasoa ona o le faatosina o taaloga ua suamalie ai le fiafia e taaalo ae galo ai le mea e tatau ona faamuamua.

O le auaunaga a le Pasifika Ola Lelei Services o loo i lalo o le faamalu a le South Seas Health Care Trust o loo taitai ai se tasi o tamalii o le atunuu le susuga ia Papalii Fuiavailili Alailima, o loo latou fesoasoani ma latou faia ni polokalame e faatosina, ma a’oa’o mai ai i mātua ma aiga ina ia aua ne’i fiafia e fai taaloga faitupe. O le manulauti o loo naunau iai le Pasifika Ola Lelei Services ia maua ni aiga soifua maloloina lelei ma ola fiafia i taimi uma. Auā e iai le talitonuga o lenei auaunaga a sese le amataga e sese foi lona faaiuga ma lona taunuuga.

O le vaiaso ua mavae i le Aso Faraile na tumutumu ai le taulaga faatau i Magale i le tele o mātua eseese mai le Pasifika e aofia ai Tonga, Fiti ma isi atunuu o le Pasifika aemaise lava i Samoa, e maimoaina le matagofie o faafiafiaga a le ausiva mai Tonga lea sa faafiafia ai faatasi ai ma le faatāuaina o le latou vaiaso o le gagana Tonga i totonu o Niu Sila.

O le zumba ma isi lava taaloga na faatinoina i totonu o lenei polokalame na maitauina ai le fiafia tele ai o nai mātua sa molimauina lea faamoemoe, aemaise ai o molimau ola nei a fanau aoga mai le iunivesete a Aukilani lea sa latou faasoa ma tuualalo ai i matua ina ia faaitiitia le fiafia i taaloga fai tupe.

I le saunoaga a le susuga ia Papalii Fuiavalili Alailima, o lea ua talanoaina i totonu o le latou faalapotopotoga, o le a taumafai e tulituli tupulaga talavou i le taimi nei ma le agai i le lumanai i totonu o lenei polokalame ina ia mafai ona faasoa ma puipui mai i latou i le fiafia i nei taaloga, auā o le latou pitolaau e lē toe mafai ona latou taofia le fiafia o tagata i le taimi nei i taaloga, ae o loo tausisi i latou i le fuaitau a le atunuu e faapea, ‘e sili le puipuia nai lo le togafitia.’

O le latou faamomoe maualuga lea o loo iai ia taumafai i latou e puipui mai o tatou tagata mai i le aafiaga lea ua malosi nei o le taaalo i taaloga faitupe. O loo taumafai foi i latou e faasoa faalautele i le atunuu le latou pito laau mo tagata e lei aafia muamua ai i lea faafitauli ina ia taofia ai i latou.

O le polokalame lenei o loo faatinoina lava i tausaga taitasi, ae pei ona saunoa Papalii ua iai le suiga tele i lenei talalelei o loo latou taulogologoina i le atunuu, ona ua iai nisi o tagata ua momoli atu lo latou agaga faafetai i le polokalame ua toe maua ai nisi manatu ma nisi o lagona lelei auā le toe faatāuaina o tiute i totonu o aiga aemaise lava i fanau.

E iai le upu e masani ai le atunuu e faapea e tafe mai mauga le manuia o nuu, aiga ma ekalesia, o lona uiga afai e sese ala e uia e tagata pito i luga e faaletonu foi ni manuia e maua e fanau o loo tupututupu a’e, ae a sa’o ala e uia e mauga mai luga o lona uiga e manuia foi fanau ma tupulaga o loo talitaliina nei manuia i le lumanai.