Ua faaalia e se faipule o le Palemene ua lē manao e faailoa lona suafa, o le toe soalaupuleina o teuteuga o le Tulafono o Faigapalota a le atunuu i le vaiaso nei i le Palemene, o le a vevela ai ni finagalo faaalia.
O loo faavae le finagalo o lea faipule i teuteuga e faasino i le vaevaeina o nuu o itumalo o loo tailua nofoa i le taimi nei, auā o loo manaomia i le teuteuga le vavae ese ma avea ma itumalo e tasi lava lona tofi i le Palemene. O loo ilitata lagona o nisi faipule o loo iai nei mo ia itumalo e tai lua tofi faipule ona o le vaevaega ua tuuina atu mose ioega a le palemene e leo tutusa ai le aofaiga o nuu. O se faataitaiga o Falealili e tele nuu i le isi itumalo ae itiiti nuu mo le isi itumalo.
O Salega o loo faapena foi ma o vala ia o loo manaomia ai se finagalo o le Palemene aemaise o le fautuaga a le komiti faapalemene na soalaupuleina teuteuga nei, ua iai lipoti e faapea na teena e le kapeneta. O lea faaiuga e mafua ina ua fautuaina e le komiti le faataatia o teuteuga se‘i faatino i le isi palota tele a le atunuu ae lē o le palota i le tausaga fou.
Ua faaalia e le Palemia susuga Tuilaepa Lupesoliai Sailele Malielegaoi, i le feiloaiga ma tusitala i le vaiaso ua mavae, e lē tele ni lavelave o iai i teuteuga o loo tau faaofi i le Tulafono autu o faigapalota e pei ona nofo faatalitali i ai sui o loo tapena e tauva i le faigapalota tele a le atunuu i le tausaga fou.
Faaalia e Tuilaepa o le vaevaega o itumalo o le a aafia i le teuteuga o loo alu sa‘o i vaevaega o faalupega o tu ma aganuu faasamoa. Peitai o le itu lea o loo atugalu ai nisi faipule e pei o Falealili ona e itiiti ai nuu mo le isi itumalo ae tele le isi itumalo.
O loo naunau se tasi o faipule o Falealili le afioga Tusa Misi Tupuola, e faatutusa lelei le aofaiga o nuu ona vavae tonu ai lea o le tuaoi o itumalo e lua o le a iai. O nisi o atugaluga o loo faasino i itumalo tu taulaga o le a faatuina ona o le a agavaa nisi o matai o nuu mavae o itumalo e tauv i ia nofoa ona o loo alala ma nonofo i eleele faatau motu poo fanua umia saoloto freehold land. O se faataitaiga o Faleata i Sisifo, ua maua ni molimau e faapea o le a tauva mai le tofa Lealailepule Rimoni Aiafi mai le itumalo tu taulaga ona e mafai i lalo o aiaiga o teuteuga fou o faigapalota faasino i se matai e nofo i se eleele umia saoloto ae lē o totonu o nuu mavae.
E lei maua le tofa Lealailepule mo sona finagalo ae ua faailoa mai e se molimau faatuatuaina o le tulaga lea o le a iai le tofi o Faleata i Sisifo o loo iai nei. O le itumalo o le Vaimauga lea o le a vavae ma lua itumalo e mafai foi e se matai o nuu mavae o lea itumalo o loo nofo i se fanua umia saoloto ona tauva mai le itumalo tu taulaga mo Vaimauga.
O atugaluga ia o loo nofo popole ai nisi o sui tauva o loo sauni i le palota tele. Peitai o le toe soalaupuleina e le Palemene i lenei vaiaso o teuteuga o le a iloa tonu ai le taotoga o lenei fuafuaga a le Malo.
