Ua leva ona faatalitali e tagata poo le ā se vaaiga o le a oo i ai le Pasifika Festival o lenei tausaga i Manukau, auā foi o le taimi muamua lea ua mafai ona see mai i le itu i Saute o Aukilani.
O le tele lava o tausaga sa faatinoina i Western Springs ona e tele toe paolo laau e faatatau mo le mamalu o le atunuu e agai atu ma matamata i faafiafiaga e faataunuuina ai.
A o loma ai le Pasifika Festival i Manukau, e tele ni lagona na agiga i finagalo o le atunuu e uiga i le nofoaga, o manatu o nisi e laitiiti toe feomai, ma e lē iloa foi ni faalavelave o le a tutupu ai ona e vaavaai i le nofoaga, a o nisi sa fiafia aemaise lava i latou o loo alala ma nonofo i le itu i Saute o Aukilani, auā foi o lea ua maua se avanoa e agai ai e matamata auā o lea ua latalata.
O le Aso Toonai 14 o Mati o le uluai aso lea o le Pasifika Festival, na maitauina ai le lolofi atu o le toatele o le atunuu e maimoa ma matamata i faafiafiaga ma le tele o faleaiga sa iai.
E lē gata i tagata Samoa a o isi foi atunuu o le Pasifika. O le vaaiga i lea aso e pei e tumutumu ai lava Samoa nai lo isi atunuu, pe a faatusatusa i nofoaga uma sa vaevaeina ai atunuu taitasi o le Pasifika.
E fai o le tele o faleaiga Samoa na faatauina ai a latou meaai a o nisi sa faatauina laei Samoa ma taulima Samoa.
O le maualuga ma le matagofie o le faamoemoe a Samoa, ona sa auai le afioga i le Minisita ia Hon Peseta Sam Lotu Iiga ma nisi o faipule o le National Party, o le afioga i le faipule o Magele ia Su‘a William Sio ma nisi o faipule o le Labour Party faatasi ai ma sui o komiti faaitumalo o Manukau.
Sa faapea foi ona malaga mamao mai ma le ausiva mai Samoa Le Taupou Manaia lea o loo taitaia mai e le tamaitai pule o le Ofisa o Turisi ia Sonya ma faiaoga. O le tatalaina o le polokalame na saunia ai e le susuga i le faafeagaiga ia Rev Elder Ioane Tamalii Lepua mai le ekalesia o le United Samoa Pentecostal Church i Avondale le sauniga lotu.
A o le Miss Samoa NZ/Miss Samoa ma le Miss Pacific Island, le tamaitai o Latafale Auvaa na ia sisiina le fu‘a o le malo o Samoa ae lagiina e le aufaipese a le Auckland Gospel Choir le vii o le saolotoga o le atunuu.
Na sosoo ai ma le ‘ava o le feiloaiga e pei ona masani ai le aganuu o Samoa i soo se faatasiga, o le Taimua Youth Ministries na latou tapenaina lenei faamoemoe, ma o latou foi sa tatalaina faafiafiaga o le aso.
Sa tele ina tulituli e tagata faafiafiaga a Le Taupou Manaia mai Samoa auā ua aave mai tala i le mananaia o ana siou, ae na faateia le au maimoa ina ua sisiva mai le fanau e amata mai le 4 tausaga agai i luga i le 10 tausaga le matutua.
O le mea na maofa ai le silasila a le atunuu o le laiti o teneiti ae ua maualuga le tulaga ua oo i ai le iloa i le faatinoina o lenei foi taleni, o le fesuisui ai o sikaili a Le Taupou Manaia na galo ai lava ma le fia‘ai o le isi loomatua ma le isi toeaina i lea aso ae faapea foi le vaavaai o tino o le au siva a le Delicious Dance Crew ma le Tatau Dance Crew.
O nisi o ausiva sa faafiafia o le Malu Measina Samoa Dance, AGC Gospel Choir, Vanni Su‘a, Grace Ikenasio, Tj Taotua, Kid Dance Crew, Charisma/ Rhayma/Darius King T’ Nay, Le La o Samoa ma le tele o nisi o faafiafiaga sa iai.
Na taualuga le Aso Toonai i le siou maoae a le tamaitai ia Cindy of Samoa ma tapunia ai loa le aso muamua o le Pasifika Festival.
Na toe faaauauina i le Aso Sa ma sa toe faafiafia ai foi nisi o aufaafiafia e pei ona atofaina i le aso mulimuli. Ae o le molimau a se tasi o tamā o loo galue i le afioga i le Minisita ia Peseta, le tofa ia Aiga Fogalelei, o le tele o Pasifika Festival e faia i Western Springs e lē misi ai lava le auai ona e o faatasi lava ma le Minisita faapea foi le Palemia ia John Key.
I sona lagona na ia saunoa ai, e tele atu le tāua o Manukau i lenei faamoemoe auā e tau fai omai uma ai tagata Samoa e lagolago, a o Western Springs e faalē toatele nisi e auai, i lona foi talitonuga ua lava ma totoe Manukau e faatino ai lenei faamoemoe i tausaga uma, auā o le manaia o Manukau e sosoo lava fale ma nofoaga i atunuu taitasi a o le nofoaga i Western Springs e fai si vava mamao o fale.
Tulaga foi i faatauga o faleaiga ma laei ma mea taulima a Samoa ua sili atu lenei tausaga i tagata faatau. Ua toatele tagata ua fiafia i lenei tausaga i Manukau ae se‘i toe silasila pea i le tausaga fou poo fea o le a toe faaauauina ai lenei faamoemoe.
