Ua fesiligia e le faafeagaiga sa umia le tofi Toeaina Faatonu o le Matagaluega a Kuiniselani i Ausetalia i le ekalesia Faapotopotoga Kerisiano Samoa, le amiotonu o le faaiuga a le Komiti o le Autoeaina, ua faamalolo ma aveesea ai lona tofi Toeaina Faatonu o le matagaluega.
Ua polili atu e lana loia le afioga Leulua‘ialii Olinda Woodroffe, lea finagalo o le faafeagaiga e pei ona faaalia e le loia, o le a oo le mataupu i le faamasinoga e talosagaina ai se poloaiga poo se Injunction, e taofia ai ae toe faaauau pea le tofi o le susuga Kerita Reupena.
Ua 27 tausaga o umia e le faafeagaiga le tofi, ae o lea ua faamauina nei, o ia le uluai faifeau EFKS ua faia i ai se faaiuga faapea, peitai o se faaiuga ua faamatalaina e lana loia ua na o se tagata na faia se solitulafono e pei o le mulilua, solitulafono tau feusuaiga, gaoi, ma le fasioti tagata e talafeagai ona faia i ai.
O le fono a le Komiti a le Autoeaina sa usuia i Samoa i le vaiaso ua mavae, na faia ai le faaiuga e aveesea ma soloia loa i le aufuefue le tofi Toeaina Faatonu o le Matagaluega a Kuiniselani. Na mafua ona faia le faaiuga e pei ona faaalia e Leulua‘ialii Olinda ae faamaonia mai e le faafeagaiga, ona o le fesiligia e Kerita o nisi o faiga faavae a le ekalesia.
O le fesili na tuusa‘o i le fono pe aisea ua faaauau ai pea ona galue le susuga i le Toeaina Faatonu o le Matagaluega a Sini Ausetalia o le taitaifono foi lea o le Komiti a le Autoeaina le susuga Toese Peleti Toailoa, ae ua 71 tausaga o lona soifua.
O le faiga faavae a le EFKS e aulia loa le 70 tausaga o le soifua o se faafeagaiga ona malolo penisione lea. O le isi fesili na tuuina atu e le susuga Kerita o se nonogatupe a le ekalesia EFKS a Salailua i le NPF na totogi ai e le ekalesia aoao le $600,000 ma le tuutuuga e toe faaola atu e lea aulotu o loo tausia e le susuga Tavita Roma o se tasi o faifeau Toeaina sinia.
O lana fesili tuliloa poo fea ua oo i ai lea iugafono poo ua totogi atu se seleni pe ua na o se vaega, ae pe ua mae‘a. Faaalia e le tamaitai loia o Leulua‘ialii Olinda, o fesili ia e tusa ma le faaaliga atu a le faifeau, na lagomia ai lagona o faifeau Toeaiina o le komiti aemaise le faifeau Toeaina o loo tausia le aulotu i Salailua ma le faifeau Toeaina taitaifono o loo galue i Sini, ma mafua ai loa ona faia le faaiuga e aveese lona tofi Toeaina Faatonu, ae taatia na o lona tofi faifeau e faaauau pea.
Ua aliali mai foi, e lē na o le isi lea pogai o le faaiuga, ae e iai nisi o mataupu faasino i le lotoifale o le Matagaluega a Kuiniselani ua mafua ai le faaiuga. Na faamatala le susuga Kerita Reupena e 29 aulotu sa i lalo o le matagaluega a Kuiniselani sa ia vaaia, peitai ua faamavae atu aulotu e 13 ma ua totoe ai nei na o aulotu e 16.
O se tasi lea o mataupu na asiasi atu ai ni sui o le Komiti a le Autoeaina i le amataga o le tausaga nei, ma faia ai loa le faaiuga o le a faatu se isi matagaluega e galulue ai aulotu ua faamavae. Peitai o loo fesiligia e le faifeau le amiotonu o lea faaiuga ona e faapea se tuua‘iga a Kerita, e iai tupe na tuuina atu e nisi o faifeau i le aumalaga ua aliali ai o se gaioiga e faatogafalea ai le mataupu.
Na ta‘ua e Kerita e tai $6,000 tupe Ausetalia na faameaalofa atu i sui ia o le komiti na malaga atu, peitai o le finau mai a le tamaitai loia o ia seleni pe afai e moni le molimau, sa tatau ona ave i totonu o le ekalesia aoao auā o tupe a le ekalesia aoao na totogi ai pasese o faifeau Toeaina na malaga.
“O le mea tonu lena e ta‘u o le faimea tonu”, na saunoa mai ai le loia. O le faaiuga o le vaiaso na tea nei na toe malaga ai i Ausetalia le susuga Kerita ma lona faletua ma nisi o lana aumalaga, ae o le vaiaso nei o le a iloa ai se taatiaga o lana gaioiga ma lana loia e tuuina atu le faaiuga a le Komiti o le Autoeaina i le faamasinoga maualuga i Mulinuu.
