Le ausiva a le LetTeine ma le ausiva a le Bula Meke sa faafiafia ai i lea aso

I le aso faamanatu a Fiti talu i totonu o Melepone, sa valaaulia ai Taitaifono Samoa e toalua le Afioga ia Alofipo Fuga Lio Ale (VicSac Victoria Samoa Advisory Council) ma le Afioga ia Pulotu Canada McCarthy (SCACVI: Samoa Community Advisory Council Victoria Inc) e avea ma malo faaaloalogia mo le latou aso faamanatu poo le Fiji Independence Day Celebration. O lenei aso sa lagolago malosi i ai le Dandenong Council ma sa avea foi le Pulenuu o Dandenong Cr Chea ma malo autu sa saunoa faapitoa i le tāua o le aso ma auala e fesosoani ai le Council i le tele o community eseese i totonu o Dandenong.

I le aso a’o faagasolo a latou polokalame, sa mataina lava le toatele o tagata Fiti ma isi motu o le Pasefika sa auai, e toatele foi aufaafiafia sa faafiafia ai foi i lea aso. E tele faafiafiaga faa-Samoa na vaaia i le faamoemoe. O le tamaitai tausala Samoa poo le Miss Samoa Melbourne, o Tama Tatau Dance Group ma le tamaitai o Zahriya ma lana ausiva. Na faafiafia foi ausiva a le Nesian Pearl, ma le Leteine Dance Group.

Taimi o le ava a le feiloaiga

O le saunoaga a le sui o le Komiti Faafoe a Fiti, le tamaitai failautusi ia Katarina Driu, sa ia ta’ua ai lona  lagona faagaeetia ona o le auai atu o tagata Samoa ma isi atunuu o le Pasefika e lagolago ma fiafia faatasi i le latou aso faamanatu. Sa ia ta’ua foi le faigata o le tapenaina o le latou faamoemoe i le uluai tausaga na faatino ai. I lena vaitau sa lē iloa tonu poo fea e alala ma papaaao ai tagata Fiti. 

Peitai o le taimi nei, ua faigofie auā ua masani ma ua silafia foi e tagata Fiti le aso ma le masina e faataunuu ai lo latou aso faamanatu, e lē gata i tagata Fiti, ae faapea foi tagata mai isi motu o le Pasefika. 

O le fā ai lea o tausaga o faamanatu pea le aso faapitoa lenei o Fiti ma ua maitauina foi le alualu pea i luma o a’oa’oga o a latou tapenaga, aemaise o le a’oa’oina o le talafaasolopito o Fiti mo alo ma fanauiti o loo soifua i atunuu i fafo.

Le ausiva a le Nesian Pearl ma le failautusi a le fono faufautua a Fiti i Vitoria, Katarina Driu

Na saunoa le Afioga ia Alofipo Fuga Lio Ale, ma sa ia ta’ua ai le matagofie o faagasologa o polokalame o le aso, ae lē gata i lea o faafiafiaga ma le tele o vaega eseese sa faatino ua faatumulia ai le faamoemoe.

Saunoa foi le Afioga ia Pulotu McCarthy, o le autu tonu lava lea o aso faapenei. 

E lē gata i le faamanatuina o le Tutoatasi a Fiti, ae o aso e aogā mo tagata uma mai soo se atunuu e faatasi uma ai e lagolago ma faailoa le tatou faaaloalo i le latou mau ma le aso faapitoa. 

Pulotu Canada ma McCarthyAlofipo Fuga Lio Ale

Ae lē gata i lea e maua a foi ma a’oa’oga lelei i le latou talafaasolopito i mea na tutupu ia Fiti i le tele o tausaga ua mavae.