Fonoifafo Seumanu McFarland – Miss Samoa 2019 – 2020

E tele mea o loo taulai i ai le silasila a le tamaitai Tausala o Samoa, Fonoifafo Nancy Seumanu McFarland, ae o loo sili ona taulai lana silasila i le tulaga o le soifua maloloina o le atunuu. Ona o le toatele o tatou tagata o loo aafia i faama’i lē pipisi ona o le auala o loo soifua ai ma taumafa ai, e iai le faanaunauga o Fono e fia fesoasoani i lena itu, i ni auala e a’oa’oina ai o tatou tagata ina ia soifua i ni olaga e tausia ai lo latou soifua maloloina.

Ta’ua e Fono, ua uma foi ona iai se latou feiloaiga ma le Pule Sili o le Matagaluega a le Soifua Maloloina, Susuga Take Naseri ma nisi o loo galulue i ofisa o le soifua maloloina, ina ia iai sona avanoa e galue ai i totonu o le matagaluega, e faasoa lona tomai e fesoasoani i polokalame a le soifua maloloina, e pei o le faia o tuipuipui e tetee atu ai i faama’i aemaise le pepesi ai o le faama’i o le misela i totonu o le atunuu.

O le ala lea ina ua fesiligia Fono e tusa ai ma le tuua o lana galuega o se tausi soifua i Niu Sila, na ia ta’ua, e ui lava o lea ua malolo mai lana galuega o se tausi soifua poo se registered nurse e pei ona sa galue ai i Niu Sila, ae malaga atu e nofo i le atunuu i Samoa auā le faatinoina o ona tiute o le Tausala a le atunuu le Miss Samoa, ae lē faapea o le a muta ai le faatinoina o ona tomai tau tausi soifua.

O le ala lea o lona fiafia i lona tomai sa galue ai, auā e iai lona talitonuga e telē se aogā o ia tomai faatausi soifua, i nisi o ana polokalame lea ua faatulaga e galue ai i totonu o le atunuu. O sona faanaunauga ua leva ona iai, ae ua avea nei le avea ma Tausala Samoa, o le a atili faigofie ai ona faaaofia o ia i le tele o polokalame a le atunuu, i le itu foi tau le soifua maloloina, ma mafai ai ona faaofi atu sana auaunaga faatausi soifua, auā lava le fesoasoani i le itu tau i le soifua maloloina o tagata o lo tatou atunuu aemaise i fanauiti.

O Fonoifafo o se tamaitai talavou e tele uiga matagofie o se tamaitai talavou e aliali mai i taimi uma e faatalatalanoa ai o ia e le au faasalalau, mai lava i le taimi na faatoa tauva ai mo le pale o le Miss Samoa NZ seia oo atu ina manumalo i le pale o le Miss Samoa. O se tamaitai e iloagofie ona uiga mautinoa, e iloa i le auala e tali ai i fesili uma e tuuina atu i ai. E ese mai ona laufofoga fiafia i taimi uma e faatalanoa ai, e faigofie foi ona lagonaina le faamaoni i ana tali, ma uiga o se tamaitai e lotomaulalo ae maumaua’i i mea na te silafia e mo se taunuuga lelei. 

Ta’ua e Fono, o le avea ma se Miss Samoa, e le o se mea na muai faatāua i lona mafaufau o se tofi e oo i ai lona tagata. Mafua lea pe a mafaufau o se tamaitai mo lena tofi e tatau ona motu le fika, e umī, e pa’epa’e ma foliga uma o se tamaitai aulelei. Peitai a’o faagasolo tausaga na ia matauina ua amata ona ese le itu ua ave i ai le faatāua o se tamaitai e manumalo i lena tauvaga, ua lē o foliga vaaia faaletino e ui e manaia, ae ua sili ona faatāua se tamaitai e iai tomai ma agavaa e mafai ona ia faia ni suiga lelei i olaga o tagata ma faaauilumaina ni mea lelei mo lona atunuu.

O inā na amata ai loa ona uunaia le tamaitai o Fono e mafaufau i lea tauvaga, ma na ia faamautinoa e ulufale i ai ma se fuafuaga ua ia iloa e mafai ona ia ofoina atu ni mea lelei mo isi. Ina ua fesiligia mo ni lu’itau o le avea ma Miss Samoa, na ta’ua e Fono, o se faigamalaga manaia mo lona olaga, aemaise le tele o mea e aafia ai ma fai ai ana vaega, ona pisi ai lea ma fiafia o loo faaaogā tatau lona taimi. Ae a oo loa ina uma le aso ma nofonofo na’o ia i lona potu, ona lagona lea i nisi taimi le misia o si ona aiga, ona mātua, ma ona tei uma. 

Peitai e talitonu le tamaitai i le mausali o lona tupuaga faaleagaga, lea e faamanatu mai ai pea e ona mātua ina ia toaga e faitau lana Tusi Paia ma toaga e tatalo, o le latou sootaga lea e sili ona vavalalata ai, ma o lona talitonuga, o le faavae papa foi lea o ana taumafaiga uma i lona olaga. 

E tele tiute o le tamaitai o Fono o loo faatinoina i lenei taimi o se Tausala o Samoa.  Ae na ia ta’ua, i le taimi e tasi, ua amata foi ona fai ana tapenapenaga mo le tauvaga tele ia Novema mo le sailia o se Tausala o Atumotu o le Pasefika poo le Miss Pacific Islands. 

Ma e na te faafetaia le Komiti a le Manaia Events o loo telē le latou lagolagosua i ana tapenaga ma le toatele o isi o loo latou galulue faatasi ina ia sologa mālie ana tapenaga uma.

E lē o manatu māmā i ai Fono i ana tapenaga aemaise o le a ia tauaveina le igoa o Samoa mo lenei tauvaga, ae o loo iai lona mautinoa ma le faatuatuaga i le telē o le fesoasoani a i latou o loo latou galulue faatasi.