“O la’u faafetai faapitoa i lo’u Tama Faalelagi, ona ua mafai ona liutino ma faataunuuina la’u miti ua leva ona fau ao fau po, o le mafaia ai ona tuufaatasia o’u mafaufauga faatusitala, e pueina ai se ata tifaga e faatatau i se mea moni lava sa tupu, ae tupu lava foi i se aiga Samoa”.
O se saunoaga lea a le Susuga i le fai ata tifaga mai Amerika ia Tulimanu Tanielu ma si ona faletua o Hinano Tanielu, o se tamaitai Hawaii ma le la fanau toatolu o le tamaitai ia Chylen ma tama e toalua o Manu Jr ma Mahea, faatasi ai ma le tausoga o le susuga ia Tulimanu o Namualii Tofa mai le afioaga o Saipipi, Saasaai ma Vaiola i Savaii.
Na soifua a’e le susuga ia Tulimanu (poo Manu) ua lauiloa ai, i Amerika i le pitonuu o Santa Ana i Kalefonia, i nai ona mātua o Mafuli Su’a Tanielu si ona tina mai Mesepa i Amerika Samoa, ma si ona tamā ia Ulua Afereti Tanielu mai afioaga o Lelepa ma Safotu i Salafai. Na ta’ua e le susuga ia Tulimanu o le latou aiga o se aiga e malolosi tele i le Ekalesia a Iesu o le Au Paia o Aso e Gata Ai poo le lotu Mamona ua lausilafia ai e le toatele.
I le faato’ā ono ai o ona tausaga ae maliu ai loa si ona tina i le ma’i o le kanesa ma tausia mai ai loa i latou e si ona tamā faatasi ai ma le lagolago malosi a mātua o lona tamā le Afioga ia Tulimalefasi Tanielu ma le olomatua ia Faaa’e Tanielu e mai Saleimoa ma Leulumoega.
Na faaalia e Manu, na mafua ona faaosofia o ia e tusitusi ni tala pupuu ma ni solo, ona o le taleni poo le galuega lea a si ona Papa ia Tulimalefasi Tanielu o le tusitala ma o taimi uma lava a’o soifua le toeaina, e na te faalogoina mai lava i lona potu le leo ma le pa’ō o le typewriter ituaiga tuai lava, a si ona Papa o loo ta ai i lalo ana tusitusiga, ma o se tasi o ana tusi na tusia ma faameaalofa mo ia se kopi ua ta’a o le “THE GIFT OF HEAVEN TO A HUMBLE SERVANT” ma o loo ia faamoemoe e fia pueina lea faaata tifaga i Samoa i se taimi o le tausaga fou.
I le 16 ai o tausaga o le Susuga ia Tulimanu na ia feiloai ai i se tasi o tamaitai Samoa sa faigaluega i se tasi o fale faafiafia mo tagata matutua i Amerika lava, ma sa ia fesiligia ai lea tuafafine pe aisea ua ia filifili ai e galue i nei ituaiga galuega,… ma faamatala ai loa e le tamaitai le talaaga atoa ma le mafuaaga ua ia faigaluega ai i lena nofoaga.
I le tausaga na tea nei ia Fepuari 2018 na toe fafagu ai lona loto faatusitala, o le a ia toe tusia ai loa le tala lea i le olaga o le tamaitai Samoa lea sa la feiloai pe tusa ma le 22 tausaga talu ai, ma faamae’aina ai loa i aso e tolu, faatasi ai ma le fesoasoani malosi a si ona tausoga ia Namialii Tofa.
Ia Novema lava o le 2018 ina ua siliga taliiseu se fesoasoani mai fale pueata tetele ma kamupani fai ata tifaga tetele i totonu o Amerika ua leai lava ma se tasi e faatāua lana tala. O lea sa la tagi ai lava i o laua lima mo le faatupeina o le pueina ma le tuufaatasia o le ata ma faaigoaina o “SOSEFINA”.
Ma o le mafuaaga tonu lena ua latou tuua ai galuega, aiga aemaise o aoga a si a la fanau i Amerika, ae faimalaga mai i Niu Sila nei mo le faalauiloaina o lana uluai Ata Tifaga ua faaigoaina, o “SOSEFINA”.
O loo momoli mai ai se feau tāua ma se aogā e lē gata o tagata Samoa/Pasefika uma, ae faapitoa lava mo tupulaga talavou. Ua latou filifilia Niu Sila e tatala ma faalauiloa ai lea ata, ona o le tele o tatou tagatānuu o loo aumau ma afifio i Niu Sila nei.
O le Susuga ia Samaga Upu Filoa o le tausoga lava foi o le Susuga ia Tulimanu e aumau i Niu Sila nei, o loo feagai ma sooupu mo lea faamoemoe.
E lei faama’oti maia se aso ma se taimi o le a tatala ma faaali ai lea ata tifaga matagofie, ae silasila lava i nisi o a tatou lomiga a sau, e logopuialii atu ai si o tatou atunuu.
