Ausiva a le Tipaula

O le tausaga 2004 na amata faavae ai le ausiva ua faaigoaina o le Tipa Ula a le auaiga o Samoeleoi mai Satupaitea i Niu Sila nei. 

O le faamoemoe o le ausiva a le aiga o le taumafai lea e lalaga le taleni ma le meaalofa o loo i totonu o le aiga, aemaise ai ia aogā le siva e toe tapu’e ma fafagu ai le aganuu ma le gagana.

Ia faaauauina pea le mafutaga vava lalata i totonu o le aiga, aemaise lava i tupulaga laiti. O le aiga Samoeleoi i Satupaitea o le tasi lea o aiga o loo iai le taleni o faafiafiaga, ma o le naunau foi lea o tupulaga talavou i totonu o le aiga e fausia se isi laasaga fou auā le faaauauina pea o le taleni, ma ia aua ne’i taotaomia.

O le tele o faaipoipoga aso fanau i totonu o le aiga, na amata faafiafia ai le ausiva a’o lei tatala le avanoa i tua i faafiafiaga tetele e auai atu i ai. 

O timaiga ma fautuaga na fautuaina ai le ausiva i totonu o le aiga sa fai lea ma taiala sili ona tāua i totonu o le ausiva o le Tipa Ula. O soo se faiva lava e masii e tapua’ia lava, e faapena le taimi nei i le ausiva lenei, o soo se faafiafiaga e auai atu i ai, e vaaia lava le masii o le aiga e tapua’ia le alo faiva o fanau i soo se faamoemoe.

O le susuga ia Kaisara Lorenzo Kaisara ma lona faletua ia Naite Kaisara na faato’ai mai ai le manaoga o le valaaulia mai Tahiti i le latou Festival ua faaigoaina o le Ia Marae Te Ao. Ma le naunautaiga ia mafai ona latou oo atu e faailoa le malu a tamaitai ma le tatau a alii i lenei faaaliga, ae sa toe taotao mai ai i tua ma le fesili pe iai se ausiva e mafai ona tapena atu mo le latou faamoemoe. Sa talia e le susuga ia Kaisara lea valaau, ona e tāua ia te ia le avanoa e auai atu ai le Tipa Ula i lea faalagamaea i totonu o Tahiti. E lua masina na tapena ai le Tipa Ula i lenei faamoemoe auā o le aso 18 o Setema e oo atu i le aso 28 o Setema e faataunuuina ai le faamoemoe. E lua foi masina sa tapena ai le ausiva ma fai sailiga seleni auā le tuuvaa atu mo Tahiti.

O le afiafi o le Aso Sa ua mavae na feiloai ai le aiga Samoeleoi ma le ausiva o le Tipa Ula e momoli atu faamanuiaga a le aiga mo le tuuvaa ese atu o le ausiva. O fautuaga ma tima’iga na tuuina mai lea e tamā ma tina matutua o le aiga e faapea, ia malaga faatasi ma le Atua e manuia ai mea uma, ia outou o, o ma le manuia, ma ia manatua o loo fai outou ma ave fu’a o le atunuu o Samoa, o aiga ma le nuu. 

O outou foi ua pei o se fugalaau na te teuteuina faamatagofie se vaaiga lelei i luga o se laulau, o lona uiga o le tou laufofoga fiafia ma le laumata ataata i taimi o faafiafiaga na te momoliina mai le feau tāua o le aganuu ma le gagana Samoa i tagata. 

O le faafetai a le ausiva o le Tipa Ula i kamupani ua lagolagoina le faigamalaga o le Stunna No Limits Otara a Otahuhu, Pacific Health & Welfare Inc, Mapu Maia – Problem Gambling Foundation, ma le kamupani O le Va.