O se uluai taimi lenei o le a tauva ai le tamaitai Samoa o Sago Feagaiga mo le tofiga o se sui auai a le Manurewa Local Board i lalo o le fu’a a le Vaega Faaupufai a le Labour. E toalua i laua ma le faletua ia Elizabeth Tuia, o sui Samoa ia o loo auai i lenei vaega.
Ua 18 masina talu ona auai Sago o se tasi o sui o loo faafoeina le polokalame mo tupulaga talavou, le “Koko Samoa Youth Show” lea e auina atu i luga o le Radio Samoa i afiafi o Aso Toonai taitasi, ma taiulu i le Afioga Seumanu Simon Matāfai. O se polokalame o loo mafai ai e Sago ona ia faia ni faatalanoaga ma le toatele o ni tagata i mataupu eseese, aemaise lava i le fofoina o le tele o luitau ma faafitauli o loo feagai ma tupulaga talavou i nei ona po, e pei o uiga ma faiga lē faamasinotu i vala eseese o le soifuaga.
O faatalanoaga nei sa matauina ai foi e lenei tamaitai le tāua o le iai o nisi e taiulu pe taimua i totonu o afioaaga, aai, pitonuu poo itumalo, e latou te faia ni faaiuga lelei ma le amiotonu mo se lelei o tagata lautele, ma faatino auaunaga mo se lelei o na itumalo, pitonuu ma aai.
O Sago sa soifua ane i le nuu malulu o Invercargill i le motu i Saute, ae o ona tupuaga e mai afioaga i Samoa o Tuasivi i Salafai ma Siumu i Upolu. O se tamaitai e naunau tele e faatino ona sao i totonu o lana ekalesia EFKS Weymouth lea o loo avea ai foi ma se taitaipese (Choir Master), ae o se faiaoga Aso Sa foi ma se taitai i le Autalavou. Na ia ta’ua foi le naunau o ona mātua e fesoasoani i lana taumafaiga e lē gat ai totonu o le latou ekalesia i Weymouth ae o le lagolago foi i lona faamoemoe mo le tausinio i le faigapalota a le Local Board.
O ia foi o le Taitaifono o le Board of Trustees mo le Waimahia Intermediate, o se tofi ua mafai ai ona telē le silafia o Sago i le tele o faafitauli ma luitau o loo feagai ma aiga i lena faaitu i Manurewa. O lona naunautaiga foi lea, ia faaaogā ona tomai lea ua iai o se tasi e malamalama i le auala e tapu’e ma faatonutonu lelei ai ni pulega, ni faiā, ma soo se meafai e iu ai i ni sootaga ma ni mafutaga lelei, ina ia atili maua ai e lona pitonuu o Manurewa se soifuaga taulau manuia.
Ta’ua i se sootaga na maua ma le tamaitai o Sago, e tusa ma le 64% o tagata o loo nonofo i Manurewa o tagata Maori ma le Pasefika, ma ua talafeagai ai ona iai foi i le Local Board a lona pitonuu ni sui auai e mafai ona tali atu ma malamalama lelei i manaoga o lena 64%. O se mea e lē o mafai ona iai i le Local Board i le taimi lenei mo se taimi umi ua silia ma le 15 tausaga.
Lona uiga ua oo i le taimi ua moomia ona faia se suiga ina ia iai nisi e fai ma sui o na tagata (Maori/Pasefika). Ua iai le manaoga ina ia matuā mautu ma faaleleia le tulaga o le soifua maloloina o le mafaufau i tupulaga talavou a lona pitonuu, ia malamalama ma faigofie i aiga o lona faaitu ona latou maua puna’oa o fesoasoani mai le malo lea e tatau ona latou maua, ia uunaia atili uiga faaaloalo aemaise lava i tupulaga talavou agai atu i tagata matutua ma tuaa sinasina, ma soo se tasi lava i totonu o Manurewa ia maua le soifua lelei ma le soifua manuia.
O na manaoga uma mo faaleleiga, pe a mafai ona avatu le faatuatuaga ma le palota a tagata uma o loo nonofo i lea faaitu o Manurewa, i le tamaitai Samoa, o le a tauva mo sona nofoa i totonu o le Local Board a Manurewa, le tamaitai o Sago Feagaiga, ma isi uma sui o le vaega a le Labour o le a tausino ai lea faigapalota. E lē gata la ia Sago, ae na ia ta’ua o loo iai foi le isi ona uso Samoa o loo latou tamomo’e faatasi ai i lalo o le fu’a a le Labour mo le Local Board a Manurewa, le tamaitai o Auliaimalae Elizabeth Tuia.
O le Aso Faraile o le vaiaso lenei, aso 20 Setema 2019, o le a tatau ai ona oo atu pepa palota i lau pusameli, ona togi mai loa lea o lau faailo e te lagolago ai i le vaega a le Labour mo le sailia o ni sui faufautua mo le Pulega a Aukilani ma sui mo le Local Board.
