Ua silia i le 20 i le tolu tausaga o galue ma tautua le susuga ia Tauanuu Perenise Tapu i totonu o Niu Sila i le taumafaiga lea o le gagana Samoa i totonu o Aotearoa. O ia o se faiaoga o le gagana Samoa i totonu o aoga e pei ona faiaoga ai le kolisi maualuga o McAuley High School i Otahuhu, o le faiaoga o le gagana Samoa mo tagata matutua, taumafaiga o le taiala mo le gagana Samoa i totonu o aoga aemaise o le faaolaolaina o le gagana Samoa ma le aganuu i totonu o le Pacific Education Centre.
O vaega uma nei ua leva ona taumafai nisi o tuaa matutua ua fai i lagi le tuligasi’a e faaolaola ma faamalosia i totonu o Niu Sila i ia vaitaimi ao galulue faatasi mai ai ma le susuga ia Tauanuu Perenise Tapu. Ua oo mai i le taimi nei o lea lava e faaauau e lenei tamalii o le atunuu le lalagaina o le gagana Samoa ma lana aganuu i totonu o Aotearoa lea ua tele ina manuia ai le toatele o nisi o le fanau faapea ma tagata matutua.
Ua le gata i totonu o ekalesia ae faapea foi i aiga ma aoga le malosi ua iai le gagana Samoa. O le lagona o le susuga ia Tauanuu Tapu e faapea, pe tatou te o mai lava i atunuu i fafo ia aua lava nei motusia ai le faatauaina o le gagana ma le aganuu a Samoa na ola ma tapue mai ai le olaga o le tagata Samoa.
O le aoga a McAuley High School o le tasi lea aoga o loo maualuga le taumafai o tamaiti aoga i le mataupu o le gagana Samoa i le iuga o suega a le fanau i tausaga taitasi. Aemaise ai o polokalame a le Polyfestival a aoga i tausaga uma e le mafai ona faoa ai foi le sili o lenei aoga i faafiafiaga faa-Samoa a aoga tamaitai pe a oo ina ofi atu i totonu o nei faalagamaea i le lua tausaga e auai atu ai.
O isi tausaga e le auai atu ai i le Polyfestival, ae alu a latou malaga taamilo i Samoa i totonu o afioaga e matamata ma aoaoina fanau i le faiga o tiute ma galuega faa-Samoa e pei ona masani ai, faatasi ai ma le vaavaai o fanau i fale mataaga o loo mafua mai ai tala o le vavau o le atunuu.
O vaaiga eseese nei i le tautua a lenei tamalii ia Tauanuu Perenise Tapu i totonu o Niu Sila ua maitauina ai ma tuufaatasia ai e nisi o le atunuu i Aotearoa nei ni faailoga poo ni maka lelei o lana tautua ma ono ofoina ai e Niu Sila se faailoga faapitoa mo ia e aloaia ai lana auaunaga mo le atunuu.
O le faailoga mai le tupu tamaitai o Peretania e masani ai i tausaga taitasi lea ua faamanuiaina atu ai ma lea tamalii i lenei tausaga.
O le po o le Aso Faraile na patipatia ai e le mamalu o le atunuu, o aiga uo ma e masani le tauaaoina o le faailoga a le susuga ia Tauanuu Perenise Tapu mai le malo i le faletalimalo o le Holyday Inn i Magele. Sa auai foi nisi o faauluuluga o matagaluega a le malo faapea nisi o faiaoga aemaise o le afioga i le konesula o le malo o Samoa ia Faolotoi Reupena Pogi lea sa fai ma saunoaga autu o le afiafi ma o ia foi sa tauaaoina le pine a le susuga ia Tauanuu i luma o tagata Samoa e aloaia ai lana tautua. I le saunoaga a le konesula na ia momoli ai le agaga faafetai ma le faamalo ma le saili malo o lenei tamalii i le atunuu lea ua faapaleina lava ia i lana tautua mo Aotearoa. O le fua lava e lulu e seleseleina foi.
O nisi o saunoaga faaopopo o le afiafi na saunoa i ai le tamaitai ia Kiri Turketo sa avea ma pule lua a McAuley i nisi o tausaga ua mavae ao lea ua pule ia Sir Edmund Hillary Collegiate, faatasi ai ma le saunoaga a le tamaitai ia Malaesilia Lia Ioane, o i latou ia sa molimau i le tautua a le susuga ia Tauanuu Tapu. O alo o le susuga ia Tauanuu sa gafa ma le faafoeina o polokalame o le afiafi ao lona atalii ia Musuiaiga Lio Tapu sa faia faaaloaloga mo le mamalu o Samoa sa auai.
O le agaga faafetai a le susuga ia Tauanuu Perenise Tapu, na ia lagona ai le agaga faagaeetia ma le loto faafetai i le lagolago malosi a le aiga, aoga, Pacific Education Centre, Fotu o Malama, asosi o faiaoga Samoa, faapea ekalesia mo ia lea ua mafai ai ona ia faaeaina lana taumafai i totonu o Niu Sila. E le mafai ona ia faia se mea pe ana leai le lagolago a le atunuu mo ia ma lona aiga. O le gagana ma le aganuu o le fatu lea ma le loto o le susuga ia Tauanuu mo le atunuu o Samoa, ia aua nei mate pe mamulu measina ia a le atunuu o loo faamemelo iai ma manumanu iai Samoa.
