Pine auro teine Hamo ‘QUICKSAND’ taamilosaga a le Rebound Volleyball Queensland

Pine auro le au a le Quicksand, tamaitai Samoa na tauva i le Ladies Masters taamilosaga a le RVQ

E tolu aso na faagasolo mai ai le taamilosaga volipolo sa faatautaia e le Rebound Volleyball Queensland, lea na amata mai i le Aso Faraile 23  e oo atu i le Aso 25 o Aokuso. Na faataunuuina i le State Titles Wooloowin le taamilosaga faitaulia o lenei tausaga.

E 58 ‘au na tausinio, e silia i le 200 tagata taalo ae 280 taaloga na faia i totonu o le tolu aso. O ‘au mai soo se tafa o Kuiniselani sa tauva e aofia le ‘au mai le kalapu a Bundamba lea na sola ma le pineauro i le Ladies Masters. 

Na auai ‘au mai Bunderberg, Wooloowin, Southpine, Ferny Grove, Wynnum ma tele lava o pitonuu sa auai a latou ‘au. 

O se taamilosaga na faatumulia i ‘au taaalo aemaise le autapuai.

Austin Muliaga (ogatotonu pito i tua) lua pine auro i au sa faamanuiaina ai i le taamilosaga a le Rebound Volleyball QLD

O se taamilosaga na maitauina le agaga finau ma le tausinio o ‘au uma, e lē gata i lea o le maualuga o le tomai na molimauina, i le faatinoina o le taaloga o le Aso Sa na faia ai le final lea. E lima ‘au na tauva i le Masters, na manuia ai taumafaiga a le ‘au a tamaitai Samoa Quicksand i le Ladies Master’s, ae lei faamanuiaina le ‘au a tamaitai talavou sa auai i le taamilosaga. 

Na matuai ofo le au papa’e i le minoi a teine Hamo i le mataalia i soo se vaega o le malae, seia oo lava ina tasi le faafitiga a aleaga, o le pineauro o le a asoa e tamaitai Samoa e aofia ai Freda Muliaga, Ario Ah Kuoi, Kisa Ropati, Ana-Marie Vaili, Gina Ripley ma Dani Elle.

O le alii o Austin Muli’aga na taalo i le Men’s Open ma le ‘au fefiloi sa taaalo ai ma alii papalagi na maua latou pine auro e lua. 

Ua tulimatai atu nei ‘au uma aemaise le ‘au a le Samoa Quicksand Ladies mo le tufaina o faailoga i le aso 14 o Setema, lea o le a faia i le The Pullman King George Square.

O se fiafiaga ia i latou uma auā e lē gata e faaaogāina pea taleni ae o se faamalositino foi mo le soifua maloloina lelei.