Toe lalaga le asosi soka mo afioaga i Aukilani

Faiaoga ma tamaiti soka i lalo o le polokalame – Pacific Soccer Academy

Ua leva ona moe le toa i taamilosaga soka a nuu ma afioaga i Aukilani, e pei ona iai le taamilosaga sa faia i nisi o tausaga ua mavae. Ao le tasi lea taamilosaga sa iai i Niu Sila nei sa iloga ai foi le maoa’e o taleni a alo ma tama fanau a Samoa na tausinio ai. Peitai o lea ua iai le alo o Samoa le susuga ia Ben Faimasasa mai le afioga o Vaipuna, Vaiala ma Moataa ua ia toe taumafai e lalaga lenei faagatama i totonu o Aukilani ina ia toe faamalosia le taleni ua taotaomia i alo ma fanau o Samoa.

Ma le isi vaega ua ia maitauina ua leai se taamilosaga soka a Samoa lava latou, ae ua toatele tamaiti ua o solo taaalo i nisi o kalapu ae sa tatau ona iai se taamilosaga faapitoa lava ia a Samoa ma le Pasifika e faaaoga ai le taleni a nei fanau. O le vaavaai mamao foi o le susuga ia Ben e uma loa le taamilosaga soka o le winter session ona malolo foi lea o tamaiti, ae i lona lagona e tatau ona malolo mai lea taamilosaga ae o loo iai se isi taamilosaga e faaauau ai le taaalo a tamaiti Samoa ma le Pasifika.  

O le taamilosaga soka sa iai muamua na faafoeina lea e le Asosi Soka Samoa i Avondale, ao le taimi nei o lea ua tuufaatasia e le susuga ia Ben Faimasasa lenei taamilosaga i lalo o lana polokalame o le Pacific Soccer Academy, ae o loo galulue faatasi ma Manukau United ma Manukau City, lea ua faigofie ai ona maua malae e faagaioi ai taaloga. O le itu i Saute o Aukilani lea ua faamautu iai lenei taamilosaga i malae i Magele, ma ua faafaigofie foi i alo ma fanau o le atunuu e malaga mai ai i taimi o taaloga.

Ua mautu mai le au a Vaiala, Vaipuna, Moaula mai le afioaga o Matautu, Kiwi ma au e lua mai Fiti, ae o loo talitali le au mai Tuvalu ma Cook Island lea ua fesootai atu foi e fia auai i lenei taamilosaga. Ua tatala le avanoa i tua mo au a afioaga ma nuu faapea foi ma au mai nisi atunuu o le Pasifika. Tilotilo foi le susuga ia Ben e iai taamilosga a isi atunuu o loo faagasolo nei i Niu Sila ma e tele le avanoa e piki ai se au se tasi a tamaiti Samoa e ono ofi atu e tauva ai i nei faagatama ma faalautele ai lava le taleni mo alo ma fanau o le atunuu. 

O le aso 21 o Setema lea ua iai le fuafuaga e tatala aloia ai lenei taamilosaga i lona malae autu i Magele, o loo tatala le avanoa i au a alii ma tamaitai matutua ae o loo iai foi le avanoa mo au a fanau laiti i le 8 tausaga agai atu i luga le 11 tausaga e amata ai i le taeao. Ua faaalia le lagona o le susuga ia Ben Faimasasa i totonu o lana taamilosaga ua faavaeina nei, na te le taofiofia ni tagata taaalo e fia taaalo i au a latou atunuu pe afai ae piki mai i latou i au a atunuu o loo o mai ai, e pei o Samoa, Fiti ma isi lava atunuu.

O le tāua lea o lana polokalame ina ia unai fanau e fai ma ave fu’a i totonu o latou atunuu, ma o lona sao foi lea i ia atunuu o loo omai ai nei fanau. 

Ua mae’a foi ona tatala lana polokalame i Samoa i Apia mo le taaloga soka ina ia faamalosia ai lava alo o Samoa i lenei taaloga, aua ua ia iloa o le tasi lea taaloga o loo manuia ai aiga ma fanau.