E ui ina toaitiiti tagata e autovaa mai i totonu o Kalaiesetete faapea luluuga le mapu o le aai ma ua utiuti foi le itu tau seleni ae ua lē mafai ai ona taofia le ulufale mai o tamaiti e fia aotauina i totonu o le Iunivesite o Canterbury.
Ua faaalia i se ripoti mai le Iunivesite e tusa ma le 14 afe le aofai o i latou ua mae‘a ona lesitala ma apalai o latou suafa mo le tausaga nei, o se faasiliga lea e tusa ma le 2 afe mai le tausaga talu ai.
Faaalia e le Vice Chancellor Rod Carr e faapea, faato‘ā mautinoa i le masina o Mati ina ua a‘e le Iunivesite le aofaiga moni o tamaiti ua talia ma ua nofoia i potu aoga. E lē taumateina le fiafia o tamaiti aoga e tulimatai le fia aotauina i Canterbury ona o loo faamalosiau ma faamanatu pea e le Students’ Association ma le Iunivesite ni auala tāua e fesoasoani ai mo le taunuuga o le latou taumafai, lea na saunoa i ai le tamaitai peresitene o le asosi Erin Jackson.
E ui ina 15% se faasiliga faitau aofai o tamaiti aoga, peitai o loo pa‘ū pasene o tamaiti sikolasipi mai fafo (International Students), ae 5% le pau o tamaiti mai totonu lava o Kalaiesetete ma isi pitonuu o Niu Sila (Domestic students).
E tusa ma le 13% le faitau aofai o tamaiti aoga na faaitiitia mai le tausaga 2011 ua malaga ese talu le mafui‘e 22 Fepuari, ma amata ai ona oia le Iunivesite i le tulaga tau seleni ma o se tala faatatau o le tupe ua pa‘ū maualalo (shortfall) i le tausaga nei e $12 miliona – $18 miliona, e pei ona faalauiloa mai e le Vice Chancellor i lana ripoti.
I se faamatalaga mai le tamaitai taiulu o alo ma fanau Pasefika i Canterbury, Liz Keneti ua iai nisi o alo ma fanau lea ua toe taliu mai i le Iunivesite e faaauau a latou mataupu e pei ona mālōlō mai tausaga 2011 ona o mafatiaga o le mafui‘e.
Peitai o se ripoti mai le Matagaluega o Faamaumauga tau Fuainumera o tagata (Statistics Dept), ua faaalia ai se aofaiga e 8,900 o tagata ua faaitiitia ai le faitau aofai o tagata Kalaiesetete, poo i latou ia ua malaga ese mai le aai i le tausaga talu ai 2011 talu ai aafiaga o le mafui‘e.
Ua tulai mai ua faapena ona faaopoopo le fuainumera o tagata ua aumau i le aai o Aukilani i le aofaiga e 6,600 i le tausaga 2011. Lipotia mai se vaega tele o lea faaopoopoga i totonu o Aukilani, o i latou ia ua see ese mai Kalaiesetete, o isi foi ua alala i pitonuu tuaoi ma nisi ua malaga atu i Ausetalia.
