O le fetalaiga ia Levaa Sauaso e lona iva i le fanau e to‘a 16 a ona mātua, o lona tamā o Levaa Fofoa Savea II ma le tina o Laalaai Vaiouga Tofa.
E toafitu ona alo faaopoopo i ai ma ona alo vaetama poo fanau vavae e to‘a 11, ona maua lea o le atoaga o lona aiga i lana fanau sa tausi e to‘a 17.
E ono suafa matai sa ia umia e aofia le suafa Levaa o Apolima, Aupaau o Salua, Ulumasui o Toamua, Satimani ma le suafa Taloto o Satui, ma Niui‘a o Saipipi i Savaii.
Na faaipoipo muamua atu ia Tusigaigoa Fausa Faafeu Ale o Toamua i le aso 4 o Me 1972, na maliu i le masina o Me o le tausaga e 2004, ona toe faaipoipo lea ia Ulata Fausa o Toamua lava i le masina o Setema o le tausaga lava lea e 2004.
O ia o se tamā e tele lona alofa i lana fanau ma lona aiga faapea ana uo, ae o se tamā foi e iai ona uiga malolosi e pei ona molimau se vaega o lana fanau ma nisi o ona tuafāfine.
O ia sa nafa ma le fatuaiga i le tausiga o ona mātua, ma e lē o se tagata sa tele ina oo i se tulaga maualuga ana a‘oa‘oga e pei ona molimau se tasi o ona tuafafine, ae o se tagata tauivi ma finau mo le atina‘e o le aiga, seia oo ina filifilia e avea ma faipule o lona itumalo o Aiga i le Tai i le Palemene lona 13.
Ina ua tapena le palota tele o le 2001 na faaalia e le palemia i lana molimau le susuga Tuilaepa Lupesoliai Sailele Malielegaoi, sa fia tauva le tofa Levaa i le fu‘a a le vaega faaupufai o le HRPP. Peitai o faiga faavae a le pati e ave le faamuamua i le sui o loo tu mai i le tofi ma o le vaitaimi lea o loo seei ai le fetalaiga Vaatiuola Lautolo Misi.
Sa lei finagalo le faipule o le itumalo e tauva faatasi ma Levaa i le fu‘a a le HRPP, ma faapea ona tauva ai Levaa o se sui tutoatasi. “Ina ua mae‘a le palota ma ua manumalo Levaa, e lei toe faatali ae taai loa lona fala ma tapena atu lana ato i le api a le vaega faaupufai.
O i e iloa ai o ia o se taitai e faamaoni ma savali i ana folafolaga, ma o se taitai foi e toa le loto”.
Na folasia foi e le Palemia i lana molimau e faapea, sa iai se tasi o ana minisita i lea vaitau sa fefulisa‘i faalaau mamafa ana tauiviga ma se tasi o atina‘e a le Malo i lea vaitau, o le faatauina lea o ni fanua i Salelologa mo le faamoemoe o le fausia ai o le taulaga.
Na saunoa Tuilaepa o Levaa na lauga i le feiloaiga ma le afioaga, ma o taleni sa ia umia ma meaalofa a le Atua na ave i ai, na iu ai lea feiloaiga i le malilie o Salelologa i le tau o le a faatau ai o latou eleele.
E tele galuega lelei sa faia e Levaa mo lona itumalo a o tu i le tofi faipule e pei ona molimau le taitai o le Malo.
“Sa finau mo se eletise mo le motu o Apolima, ma o lana finau malosi na avea ai Apolima e oo mai i le taimi nei ma vaega muamua o Samoa ua mu eletise i le malosi mai ‘ave o le la”.
Sa finau mai foi mo le faaleleia o le suavai, ma le faatuina o ni masini e gaosi ai le aisa, ma o le isi lea atina‘e na faatuina i Apolima i lona taimi sa iai i le tofi o le fale e gaosi ai le aisa e faaaogā e le au faifaiva vaa fagota ‘alia.
O le tele o galuega sa ia faia na faaalia e le Palemia sa la feiloai ai ma ia faapea atu, e toe foi atu i le Palemene i le palota o le 2006 ona e manao e faatino nisi o galuega lelei ma le faamalosia o le faavae o le atunuu.
Peitai ina ua la feiloai ma Levaa ina ua lē manuia i le faiga palota lea, sa ia faailoa atu ai e lē o le tele o galuega e toe filifilia ai se faipule e lona itumalo, ae o le lelei o le va ma le itumalo ma le nuu.
“O se isi lea lesona tāua tele na ou maua mai ia Levaa, ma o la‘u tala foi lea e fai i sui faipule o lenei vaega, e lē o le tele o galuega e te faia i se taimi puupuu e tulai ai i le tofi e toe filifilia ai oe e le itumalo, ae o le lelei o le va ma Tapaau ma taitai o le nuu”.
O le molimau a le tina le tausi o Ulata Fausa Levaa Sauaso, na ia melotagi ai ma faamatala le alofa tele o le tamā i le la mafutaga aemaise o a la fanau.
“O se tamā e tumu i le alofa ma e lē mafai ona faagaloina, ae na te iloa e iai se a‘oa‘oga lelei o le malaga a Levaa. Alu ia Levaa ma ni faaletonu ma ni leaga, ae ou te faatoese atu foi pe a iai ni o‘u aleu i le mafutaga ma le tamā”.
O le susuga i le faafeagaiga o le EFKS a Apolima-uta, susuga Avele Utumapu, na taitaia toe sauniga uma o lea taitai.
O le afioga i le sui o le Fono a Sui Tofia, Tuimalealiifano Vaaleto‘a Sualauvi II, sa auai i toe sauniga o le Tofa Levaa Sauaso, faapea le afioga i le Palemia ma nisi o Minisita o lana kapeneta. Sa auai foi le taitai o le Itu Agai, faapea le mamalu o aiga e fia o paolo ma gafa, ma le maave eseese o uo ma aumea mamae.
O se tasi o fanua o le Tofa Levaa i Mulifanua o loo lagomau ai. O le aso 11 o Ianuari 2012 na usufono ai le fetalaiga ia Levaa ona o se faalavelave e pei ona faamaonia mai e leoleo o le pule i le ola.
Ua 69 tausaga o lona soifua, ma ia iai pea faamafanafanaga i le aiga ma le fanau faapea uo ma aumea mamae ona o le motusia o le mafutaga i le olaga nei ma le tamā.
