Unaia le tofi o Sui o le Malo i Tamaitai

E silia i le toa 300 tamaitai ua faaee i ai le tofiga o le Sui o le Malo i totonu o afioaga o Samoa.
O se tofiga na faia e le Malo i le lua tausaga talu ai ona o le manaoga ina ia saga unaia nisi o atinae a tamaitai ma ia maua mai ai le lagolagosua a alii ma faipule o nuu uma.
Talu ona amata a latou galuega, o nisi o a latou tiute ua faamalosia o le faatino lea o falelalaga aua le taumafai ai o Samoa e toe faaolaola le lalagaina o le iniini poo le iesae – ma ia unaia ai le tomai faamatuauu ma le au seepapa, aveese ai ma lālāga mai le toe faaaogaina i faalavelave i Samoa i aso nei.
O le tele o galuega a i latou ua i lenei tofiga, ua o latou fesootai ma le Matagaluega o Tina & Tamaitai, Atinae o Nuu ma Afioaga ma Agafesootai.
E lipoti i ai atinae o loo faatino e tamaitai o afioaga taitasi e ala i Komiti a le itupa o tamaitai. Ua iai falelalaga.
Ua iai faamalosi tino ua faatautaia i le tele o afioaga i Samoa ma ua iai asiasiga masani aua le tumama lautele o afioaga uma. Ua iai foi ma isi galuega ua faatino e tina e pei o suisuiga a Komiti ma le faamamaina o nofoaga ua ave i ai faasao a afioaga taitasi.
O nei galuega uma ua taulamua ai le Sui o le Malo. Ae o le maea o le lua tausaga talu ona faatu nei tofiga, o lea ua aloaia e ala i le aofia ai i totonu o Tulafono a Samoa.
O le tulafono taufaaofi lenei ua amanaia ai le tofiga lenei o le Sui o le Malo mo tamaitai. Ua sau ai ma le avanoa e mafai ai ona aofia le sui lenei i totonu o le saofaiga a Matai o se afioaga ma faaali i ai galuega fia faaleleia, o faitioga e faatatau i le saogalemu ma le soifua maloloina o tamaitai o se afioaga, aemaise o faamoemoega o loo moomia ai se sao o le malosi o le nuu ma alii ma faipule.
O se tofi na manino le tele o le lagolago a sui a faipule ina ua tuuina atu e amanaia faaletulafono ma na faaalia ai foi le agaga faafetai o le tele o sui a faipule i tamaitai ma tina o Samoa i lo latou sao i le atinae o Samoa aemaise i totonu o aiga, nuu ma ekalesia.
Ona pau nisi o mataupu na laga e nisi o sui a faipule o le itu lea, pe le o le a faoa ai le pule ua masani ona ave i le saofaiga a matai o se nuu lea e toatele lava i alii, pe afai o lea ua faataga e le Malo le leo o le Sui lea i totonu o upufai a nuu.
O le tali a le Minisita e ana le teuteuga lea ua faaofi atu i le tulafono, Fiame Naomi Mataafa, ua tele tausaga o faatino e alii faaiuga fai o nuu, e ui o loo manino le sao o tamaitai i nei faaiuga fai ma le faatinoga o atinae, ae e foliga mai o lo latou leo lava i faaiuga nei o loo iai lava si eseesega ma le leo o alii. O se auala lenei o le a mafai ai e tamaitai ona momoli sao atu o latou finagalo, e tauala atu i tamaitai ua tofia o Sui o le Malo.
Faaalia e Fiame Naomi, o loo tumau nuu o tamaitai ma nuu o alii, ma o le tele lava o faatinoga o faaiuga fai, e aumai se manatu a le fono a tamaitai ona momoli lea i le fono a alii mo se latou lagolagosua poo se faamaoniga.
O lona manatu e tatau ona tutusa avanoa e faia ai nei filifiliga ma ia ave lava le avanoa i tamaitai o loo faatinoa le tele o galuega faaleleia o le afioaga, ina ia aumai ai so latou finagalo i ia upufai i totonu o afioaga.
Taua e Fiame e le o iai se manatu o le Matagaluega e aveese le faauluuluga lea ua masani ai afioaga mai i alii ae e taua tele le sao o tamaitai e tatau ona amanaia.
Sa tulai le sui a faipule o Lefaga ma Faleaseela, Le Mamea Ropati, faapea le sui o Faleata i Sasa‘e, o Lealailepule Rimoni Aiafi ma faaali o la finagalo e tatau la ona vaavaai foi le Matagaluega a o talanoaina lenei tulafono fou ina ia iai foi ma sui o isi vaega o le afioaga, e pei o taulelea, le malosi o le nuu aemaise foi tupulaga talavou, ina ia aua ai nei faapea e le o aofia uma sui o le nuu i le suiga ua fuafua nei.
Sa iai foi nisi na laga se manatu e tatau foi ona iai se sui o Faafafine i totonu o nei saofaiga, peitai e lei talia e nisi sui a faipule ia manatu laga. Na laga e le sui o Falealili, Tuiloma Pule Lameko le tatau lava ona matua faamanino lelei matafaioi a le Sui o le Malo ina ia aua nei tulai mai ai ni feeseeseaiga ma le isi foi Sui o le Malo, le Pulenuu lea i faaiugafai i totonu o afioaga.
Ua talia nei le pasia o lea tulafono taufaaofi i le Palemene. O le taimi lenei o loo totogi le Sui o le Malo e pei lava o le Pulenuu i le faatinoga o a latou tiute i totonu o nuu taitasi o Samoa.