Teena e le Malo le Puipuiga o Aseta

O le Aso Lulu ua tea na teena ai e le Malo a le National le tulafono taufaaofi a le Leipa i le puipuiga o aseta taua o loo umia e faigamalo laiti i Aukilani.
O le autu o lea tulafono taufaaofi o le taofi lea o soo fuafuaga i le lumanai e faatau ese i le au faipisinisi aseta ua silia ma le 28 piliona tala lona tau. E ese mai le $28 piliona mai le fia miliona tala o tupe maua i tausaga taitasi mai ia aseta.
O ia aseta e aofia ai le malaevaalele i Aukilani, o le uafu, fale ma malae o taaloga, ofisa, fale o tagata matutua, faletusi, suavai taumafa, ma le anoanoai o eka o fanua o loo naunau i ai le au faipisinisi.
O loo taumafai lava le faigamalo e nana lo latou naunau e pulea nei aseta. Sa muamua saunoa le taitai o le National a o lei faia faigapalota o le 2008 e faapea, e le o iai se fuafuaga a le National e faatau ese se aseta a le Malo. Na toe fesiligia mulimuli ane, ae ua sui lana tali faapea, “e le o iai se fuafuaga a le National e faatau ese se aseta i le latou nofoaiga muamua”.
Peitai o le filifiliga muamua lava a le Palemia na fai o le filifilia lea o le taitai o le ACT e fai ma Minisita o Faigamalo Laiti.
O ia lea na unaia faatopetope i totonu o le Maota fono o le Palemene le tulafono taufaaofi a le Malo e faavae le Super City mo Aukilani aoao. O le tulafono foi lea ua faaleaogaina ma soloia ai pulega uma o faigamalo laiti o loo iai nei e pei o Manukau ma isi.
E le gata i le soloia ma faaleaogaina pulega o faigamalo laiti, ae na faavae e le Malo se komiti faapitoa, le Auckland Transition Agency, e pulea uma aseta ma le au faigaluega i Aukilani aoao.
E toalima sui o lenei komiti faapitoa, o tagata faipisinisi uma na filifilia faapitoa e le Malo, ma e na o le Malo foi e lipoti i ai. O lona uiga ua le mafai ona gaioi lava se isi o pulenuu ma councilors seia vagana ua malilie i ai lenei komiti faapitoa.
Ina ua avea ma Palemia John Key sa ia faalauiloaina faapea e tumau pea le lagolago i aseta o Niu Sila e pei o le KiwiBank ma isi aseta o loo pulea e le Malo.
Peitai na mulimuli ane ua toe sui foi lea faamatalaga ma faapea mai, “e le faapea o ia ua iai sana filosofia e tetee i le faatau ese o aseta. E le faapea foi ua fai mai e le faatau ese aseta ona tumau ai lava lea o lena talitonuga i le faavavau.”
Sa muamua foi saunoa John Key i le tausaga ua tea e faapea a maea galuega a le Royal Commission i le sailiiliga i pulega o faigamalo laiti i Aukilani, e le faia lava se gaioiga a le Malo seia vagana ua soalaupuleina lea mataupu ma tagata lautele o Aukilani.
Ua manino lona le tausi i ia faamatalaga aua na faatopelau le faaofiina o le tulafono muamua ma faavae ai loa le Super City, e leai lava se tapa i tagata lautele o Aukilani mo so latou finagalo.
E oo foi i le tulafono lona lua, sa tatala i tua le avanoa mo finagalo faaalia o tagata lautele o Aukilani, ae puupuu lava le taimi sa faaavanoaina mo tagata lautele.
Ua manino le mata o le vai i fuafuaga a le Minisita o Faigamalo Laiti, Rodney Hide, o ia e fiafia tele pe a faatau ese aseta o Aukilani i le au faipisinisi. O lana faamatalaga lea na faia i le polokalame o le Campbell Live, i le aso 19 o Aukuso faapea e manao ia faatau ese Ports of Auckland.
A o nei aseta poo pisinisi umia faale-Malo, o aseta uma na faatupeina e tagata lautele mai a latou lafoga ma rates. O le fia miliona tala o polofiti e maua mai ia pisinisi faalemalo e faatupe lava mea i atinae mo le manuia o tagata lautele e pei o faletusi, o malae o taaloga, ma le anoanoai o isi atinae e manuia ai tagata uma.
O le mea foi lena e mafua ai le tetee o tagata lautele i le faatau ese o ia aseta. I se tasi o suesuega poo “polls” sa faia i le vaiaso ua tea, sa fesiligia tagata Aukilani i so latou talitonuga i lenei mataupu.
E 85% o Aukilani e tetee i le faatau ese o kamupani suavai taumafa i le au faipisinisi.
E 82% e tetee i le faatau ese o fanua, malae o taaloga, paka, faletusi, fale o taaloga ma fale o loo faia ai fiafiaga.
E 78% e matua tetee i le faatau ese o le uafu ma le malae vaalele i le au faipisinisi.
Afai ae maua e le au faipisinisi ia aseta, na o latou lava e manuia ai ae faaletonu tagata lautele. A o le afu o le lautele na alu i le faavaeina o ia aseta mai le amataga ua tafea i le vanimonimo.
Afai e taua aseta ia te oe, faailoa lou finagalo i lou faipule aemaise faipule o le faigamalo.