Manumalo Kelston Boys Tauvaga Siva i mamanu faa-Pasefika

O le afiafi o le Aso Toonai talu ai na faataunuu ai se tasi o faatasiga pito sili ona telē a tupulaga talavou i totonu o Niu Sila nei, lea sa faamanatu ai tu ma aganuu a Maori ma le Pasefika e pei ona faataunuuina i le nofoaga o le YMCA i Aukilani, i le itula e 7 i le afiafi.
O le auga o lea faamoemoe, o le suega siamupini poo finals mo le tauvaga siva a le vaega ua faaigoa o le Toa Toa ma le tauvaga musika a le Smokefree Pacifica Beats, lea na molimauina ai le mataina ma le uigaese o le matagofie o nei vaega o aganuu a atumotu eseese o le Pasefika.
O le Toa Toa, na uluai faavaeina e sui auai o le faalapotopotoga a le Mika Haka Foundation, i lo latou sini autu ina ia uunaia tupulaga talavou o Niu Sila, ia malamalama ma fiafia e faatino lana ia lava aganuu e tauala atu i le siva.
O vaega sa fua i ai le silasila ma togi faatulaga a faamasino mo e na tauva, o le ausiva e sili ona malie ma mataina a latou taga ma ia original pe o ni taga na fafau lava e latou, e lē ni taga e kopi mai isi, ma ia mamanu faatasi le sikaili o le hip hop ma nisi taga uigaese e atili mataina ai le siva, aemaise ia fili faatasi ma ni tagata o siva a atumotu eseese.
O lenei faamoemoe o loo lagolagoina le polokalame o le Ka fitness and movement, o loo aoao ai e le vaega a le Mika Haka Foundation fanau i aoga, ina ia fiafia i ni olaga e soifua maloloina, ma ia naunau e fai le faamalositino e ala i le faia o ituaiga taga nei e pei o le siva, lea e le gata ina faamatala atu ai o latou lagona ma mafaufauga, ae o se faailoaga foi o a latou tu ma aganuu.
Sa lagolago foi e le faamoemoe a le Toa Toa le feau taumomoli a le Foundation, ina ia ola malolosina fanau talavou, e ala i le faasaina i lea afiafi o le faaaogaina o le ava malosi, fualaau faasaina, ulaula tapaa, o taumafa e le lelei mo le soifua maloloina, aemaise foi le matua faasaina o ni uiga faasauā mo ni faiga kegi, o se fuafuaga na lagolagoina e le Matagaluega a le Soifua Maloloina, le Auckland City, JR Mckenzie Trust.
E lima ausiva na sao atu i le suega siamupini o lenei tausaga lea sa tauva ai mo le faailoga tupe e $5,000, ae iai foi ma nisi faailoga faapitoa na saunia.
O ausiva nei: Mt Roskill Grammar: The Boomshakalaka’s; Mt Roskill Grammar: The Shaka Shakin’s; Aorere College: Retro; Takapuna Grammar: R.D.C; ma Kelston Boys: Unison Dance Crew.
O nisi o ausiva na manumalo foi i lenei lava tauvaga i tausaga ua tuanai atu, e aofia ai le RFC-2002, le Dziah-2003, le Haka Hula-2004, ma le Potiki Dance Crew-2005.