E 4 afioaga o Savaii ua fausia ai ni faletalimalo

E 4 ni afioaga o Savaii o loo fuafua se kamupani mai Hawaii e taua o le South Pacific Development Group e faatutu ai ni atinae tau faletalimalo, e aofia ai Salelologa, Palauli, Pu‘apu‘a ma Sasina, o le nuu lea ua maea ona sainia se maliega ma ona alii ma faipule. Ua taua i se pepa o faamaumauga i le taiala ua faataoto mo ia atinae a le SPDG, o loo faaalia ai ua maea ona faamautu le lisi e 600 eka mo le 120 tausaga i se tasi o vaega o Savaii, ae o loo faagaioia nei le lisi mo le 300 eka i Pu‘apu‘a.
O ia eleele o loo faatatauina e $22 tala i le eka e lisi ai i le masina, faatusa i le tau e tatau ona iai i le taimi nei e $80 tala i le eka. O loo iai le fua e siitia lea totogi o le eka e lisiina ai i le isi tolu tausaga o lumanai i le tau e $200 tala i le eka.
O lea lava faamaumauga o loo faaalia ai foi le tele o nisi o le au faipisinisi faletalimalo i Amerika ua faailoa lo latou manao e fia maua ni avanoa i Savaii e faatutu ai ni a latou pisinisi mo tagata tafafao, e auala uma mai i le South Pacific Development Group, le SPDG. O Sasina le afioaga muamua ua mautu a latou feutagaiga e pei ona maea tuuina atu se vaegatupe o le totogi o le lisi o o latou eleele, lea na muamua faatino lea tulaga i le tausaga ua mavae, ae o nai masina e lei mamao tele atu na toe ave ai le isi vaegatupe o le totogi o le lisi.
E iai le talitonuga o le a tele se fesoasoani o nei atinae i le tamaoaiga o Samoa, pe afai o le a faataunuu ma tele ai foi ni avanoa faigaluega mo tagata Samoa o loo alaala e latalata atu i nuu o le a faatutu ai nei faletalimalo.
O atinae nei o loo fiafia le malo e faaulufale i totonu o Samoa, aemaise lava i lenei vaitau ua amata ona teva ese le toatele o turisi mai isi atumotu o le Pasefika e pei o Fiti ma Solomona lea o loo tele ina tulai mai ai vevesi i le va o tagata o le atunuu ma latou faigamalo.