A o faagasolo pea polokalame faataatitia a le vaega o le fuavaalele a Niu Sila, le Royal New Zealand Air Force (RNZAF), e pei ona galulue ai i Samoa i le taimi nei, o loo faapea foi ona maua o latou avanoa e asiasi solo ai e le gata i faalapotopotoga mo le ofoina o ni galuega fesoasoani, ae ua aofia ai foi ma nisi o aoga i totonu o le atunuu.
I le vaiaso talu ai, na maua ai foi se avanoa e asiasi atu ai nisi o le fanau aoga o le Year 4 mai le aoga tulagalua a le Peace Chapel Christian Primary School, i lo latou fia matamata ma aoaoina nisi o tomai a o tuufesili atu ma talatalanoa i nisi o loo galulue ai lea polokalame a le Malo Niu Sila i Samoa. O lea asiasiga na agai atu i le nofoaga o loo faamautu i ai vaalele helikopa a le RNZAF, i Faleolo.
E toa 26 le fanau aoga na agai atu, ma sa faaleo o latou agaga fiafia ua maua foi sia malamalamaga faaopoopo i tulaga tau femalagaiga i luga o nei ituaiga o vaalele. Na mafai e le fanau aoga ona matamata i vaalele ma taavale o loo faaaoga i galuega faavaegaau poo fitafita, lea e aofia ai loli e lauina ma utu toe faatutumu vaalele, o masili lifi (forklifts) ma 4x4s.
Sa faamatilatila e le alii ofisa, Brian Looker i le fanau aoga, e taua tele le galuega o loo faaaoga i ai na ituaiga o vaalele e pei o le TROPIC ASTRA 09, ma e moomia ai e le RNZAF e le gata o se vaega toatele o tagata e galulue ai, ae ia lava ma lelei aupega ma meafaigaluega o loo faaaoga ai.
Na taua le maofa o alii ofisa o le Airforce i le tele ma le anoa o fesili a nisi o le fanau, aemaise o latou foliga naunau fia iloa na matauina. Taua e se tasi o alii ofisa, ‘O ai na iloa pe tei ua avea foi se tasi o nei tamaiti ma se pailate i na ituaiga o vaalele’.
Saunoa le tamaitai faiaoga ulu na taitaia atu le maimoaga a le aoga, Charlotte Letcher, o se avanoa lelei tele lea mo le fanau laiti e vaai tino ai lava i nei ituaiga eseese o auala o femalagaiga.
E le gata la i le maimoaga a le aoga tulagalua, ae na asia foi e le RNZAF nisi o kolisi maululuga a le atunuu, e pei o Pope Paulo le VI i Leulumoega Tuai, le Kolisi a Sagato Iosefo i Alafua, ma le Kolisi o Samoa i Vaivase, ona e iai le talitonuga o alii ofisa o le ami, e tele se aoga o nei talanoaga i galuega faapea, mo fanau nei ua latalata ina faaiu a latou aoaoga, a o mafaufau atu i ni galuega i le lumanai, aua atonu e ono filifili e nisi fanau le auauna i vaegaau a atunuu, e galue ai, pe afai e malamalama lelei i mea o loo faatino ai.
O polokalame faagasolo nei a le RNZAF e faatulaga i tausaga taitasi, e faataitai ai le tele o galuega laveai e faatino i taimi e tulai faafuasei ai ni mala faalenatura, ma faaaoga ai foi ituaiga o vaalele nei.
Sa amata mai le aso 29 o Iulai lenei polokalame i Samoa, ma e faamoemoe o le aso 1 o Setema o le a faamaea ai ma toe taliu mai i Niu Sila nei.
