Silia i le $60,000 taulimaina e Mutiatele-Lotopu‘e-Malaela

E maeu le lagolago ma le taupati atu o le atunuu o e na lagolagoina le faamoemoe i le tusigaigoa a Mutiatele-Lotopu‘e-Malaelā e pei ona sa faataunuuina i le hall a Gatapuvae i Magele i le Aso Toonai na sei mavae atu nei.
O lenei faamoemoe o le tau sailia lava lea o se seleni aua le fausiaina o le malumalu tapuai a le Ekalesia Faapotopotoga Kerisiano Samoa i totonu o le afioaga o Mutiatele, e pei ona faatalauula mai ai le susuga i le faafeagaiga ia Rev Timoteo ma le ekalesia.
Na amata le faamoemoe i le sauniga lotu sa saunia lea e le susuga i le faafeagaiga ia Rev Mafutaga Faaleaoga o le Ekalesia Faapotopotoga Kerisiano Amerika Samoa i Wiri, ma amata ai loa ipu a matafale e pei ona masani ai aso faapenei.
O se vaaiga mataina sa molimauina e le tusitala pe a fua atu i nai aiga o le mafutaga, ae maeu lo latou lotonuu ma le tautua lotu aua le galuega a le Atua. Sa faigofie ona maitauina lea vaega i le sagisagi fiafia ane i le taimi e valaau ai siva a aiga, ma e leai se matafale sa faatamala.
E oo foi i le mamalu ma le paia lautele sa faatasi atu sa maeu lo latou alofa tulai e faailoa lea i le tele o seleni sa o latou lafoina mo le faamoemoe.
O le mafutaga lava i le faletolu o Mutiatele-Lotopu‘e-Malaelā sa taulamua i lenei sailiga seleni, lea o loo taitaifono ai le afioga Pulemagafa Leota, ma le failautusi le afioga Leuluaialii Fred Key atoa ai ma le teutupe, le susuga Pelepesite Hakai.
Na iu le aso ina ua maea le faamoemoe ma tuufaatasia ai le aao mafola o le paia maualuga i le mafutaga, o aiga ma uo sa fesoasoani atu i le tusigaigoa, ma ausia ai le silia i le onosefulu afe tala o le faitau aofai o le tupe atoa sa maua.
I se feiloaiga ma le taitaifono o le mafutaga sa saunoa ai le afioga Pulemagafa Leota, o le a latou faimea faalogologo pea i le susuga i le faafeagaiga ma le ekalesia i Samoa e tusa ai ma le faaooina atu o lenei seleni tele aua le faataunuuina o le faamoemoe, e ala lea i le fausiaina o se isi falesa tapuai a le afioga.
Sa faaalia foi le agaga faafetai e le afioga i le taitaifono, le afioga Pulemagafa Leota ina ua talanoa ma le tusitala ma ia faafetaia ai le alofa o le Atua, aua e leai se latou lagona o le a maualuga faapenei se tino i tupe o le a o latou mauaina.