Faataua e Le Ola Trust le soifua maloloina

O le Aso Toonai na tea nei, 22 o Aukuso sa faatumulia ai le hall o le Samani Pulepule i le faamalositino a le Ola Trust. E ova ma le 100 i latou sa fiafia e faia faamalositino i musika mai atunuu eseese, aemaise lava i musika faa-Pasefika.
O se vaaiga fiafia ona o le fiafia o tagata uma, e amata mai i matua, e oo i fanau laiti e o atu ma matua, sa vaaia le fiafia o tagata e fai faamalositino ma taga a le taitai o Sefo Aitiope, o se alo o Samoa o loo faaaoga ona taleni e fesoasoani ai i tagata Samoa ma isi atunuu eseese e auai i vaiaso taitasi i nei faamalositino.
E taua ia i latou e faafoeina lenei faamalosi tino le omai faatasi o aiga, e amata mai i matua o matua, matua ma fanau e oo lava i fanau o i aoga faataitai ma pepe. E taua i lenei exercise i le fiafia faatasi ai o aiga. O matua ua fai si matutua tele, sa alaala lava i luga o nofoa ma fai mai a latou faamalositino pe saofafai i lalo.
O tupulaga sa i laina i luma. O upu o pesega e tuu mai i luma e faataitai i ai fanau. O upu ma pesega Samoa o Samoa matalasi sa pepese ai i latou uma sa auai i lenei exercise i le taimi na faaiu ai le polokalame.
E taua ia Leuluaialii Olinda Woodroffe le iloa e a tatou fanau upu o pese Samoa tuai.
O le Aso Toonai sa fai ai le breakfast, e sami ai le atoa o le tausaga o lenei faamalositino. Sa amata ona o le mafatia o le tamaitai loia o Leuluaialii Olinda Woodroffe, i le le fetaui o tulaga na maliu ai Folole Muliaga. Sa laga ai lona manatu ia fai se exercise e omai uma i ai o tatou tagata e le o i se gym, faatasi ai ma a latou fanau i Aso Toonai uma i le 8 i le taeao.
Sa faafetaia le agalelei o le Samoan Assembly of God, i le taitai o Samani Pulepule ma faafeagaiga ma faletua o lea ekalesia ua mafai ai ona ofoina ma maua e o tatou tagata lenei fesoasoani.
Sa faafetaia foi Sefo Aitiope ma le faletua ia Florence i le la tautua e ala i le faamalositino. Na faafetaia foi le Radio Samoa ma le Samoa Times mo le latou tautua i vaiaso taitasi i le faasalalauga o lenei faamalositino.
O se vaaiga matagofie ma le felanulanuai o tagata mai isi atunuu sa auai i lenei faamalositino. Sa tatala i le tatalo ma faaiu i le tatalo.