O le taeao segisegi ina ua amata le taamilosaga o le kirikiti Samoa na totō uaga.
O le mau a nisi, a amatamea uaga o lona uiga o faamanuiaga aemaise ai o lea ua tele masina o mugala faasoloatoa le atunuu.
O le mafuaaga foi lea na laititi lava se aafiaga o le faaauau ai o taaloga kirikiti ina ua potopoto ‘au o Samoa e tausinio ai i lenei taamilosaga i le malae o le afioaga o Lotofaga.
Ua savalia nei le fā tausaga o faagasolo taamilosaga kirikiti Samoa e le afioaga o Lotofaga ma na maua le avanoa e molimauina ai le amataga o lea taamilosaga mo le tausaga nei i le faaiuga o le vaiaso na se‘i mavae atu. E ui i le louloua o le tau ae na faagasolo pea lea taamilosaga i va o ‘au e 12 ua mafai ona faaulu ma e lua ni vaega ua vaevaeina i ai lea taamilosaga poo pulu ma e ta‘i ono au i le pulu.
Na ta‘ua e le susuga i le Failautusi o le Komiti le tofa ia Paivao Mosese Matamea, o le faamoemoe o le faatautaia ai o lea taamilosaga i totonu o Lotofaga, ona o se tasi lenei o measina a le atunuu ua tauau ina mou atu ma ua a‘e ai se tofa i tamalii o le afioaga e tatau ona faia se taamilosaga faapea e toe faaolaola ai le kirikiti faa-Samoa.
“E na o le Sisigafu‘a ma le Teuila o loo faatautaia ai lenei taaloga ae manaia le faia o se taamilosaga faapea, ona o loo tele ni alagaupu ma nisi o punaoa o le tatou gagana o loo maua mai ai ma e talitonu e aogā tele mo fanau aoga aemaise o tupulaga laiti o le atunuu”, o le saunoaga lea a le susuga i le Failautusi, Paivao Mosese Matamea.
O le amataga mai o lenei taamilosaga i totonu o Lotofaga e na o ‘au lava a le afioaga na tauva ai, peitai o le tausaga na tea nei na mafai ona faaulu mai ai nisi o ‘au mai nuu i tua ma o lea foi ua mafai ona auai mai ma Salafai.
E na o alii o loo mafai ona tauva i lea taamilosaga ona na ta‘ua e Paivao o le faaeteetega o le komiti i ni faafitauli e ono tulai mai ua faatuai ai ona tatala le avanoa i ‘au a tamaitai, peitai o loo iai le faamoemoe e tatala le avanoa mo ‘au a le itupa vaivai i se taimi o i luma. Na faaalia foi e Paivao e tele se faanaunau o le latou komiti e saili se nofoaga tu lalata i le taulaga e faafaigofie ai mo ‘au mai Salafai peitai na ia toe ta‘ua o le matagofie lava o kirikiti Samoa o le faia i nuu i tua.
Na momoli foi le agaga faafetai o le komiti faafoe i nisi o kamupani faapea ma nisi o tamalii o le afioaga o loo fesoasoani atu i le faatupeina o le taamilosaga.
Na ta‘ua foi e le failautusi na savalia e le latou komiti le Malo mo se fesoasoani i le itu tau seleni auā le faaleleia pea o faailoga o le taamilosaga ma o loo latou tālia pea i le taimi nei ona e lei tali atu lava.
O le ‘au a le Fetuao mai Tiavea lea o loo latou umia nei le talita o le taamilosaga ma o loo faagasolo pea taaloga ma o loo iai le manatu o le komiti afai e faaauau ai pea le lelei ma le finau o ‘au o loo tauva, o le a lē faamutaina lea taamilosaga.
O le fā tausaga talu ai la, sa na o a‘u lava i totonu o Lotofaga, sosoo ai lea ma tuaoi ua agai ane ma talosaga i tausaga e sosoo ai le fia auai i le taamilosaga.
O le tausaga lenei e mataina lona tulai mai i le faagasoloina o le taamilosaga ona na ta‘ua e Paivao, o le taimi muamua lea ua mafai ona auai mai ai se ‘au mai le motu tele i Salafai ma o le ‘au lea a le Ma‘asioafi mai Tapueleele. Ua iai le manatu e faaopoopo foi nisi ‘au i le tausaga fou ae o le taulai i le taimi lenei o le iai o ni ‘au o le a tausinio faaauau i le Teuila o lenei tausaga. Ua iai foi ma le faamoemoe e faaopoopo ‘au a tamaitai i ni tausaga o i luma.
