Ua oo i le vaitau o le tuaoloa, o le vaitau o le malulu o po ma le malosi o savili mai i Sasae ua faapea ona aafia ai le toatele i gasegase o le tino.
O le tau lenei e faapea toeaiina ma loomatua, o le tau e malosi ai meaola ma lausiusi ai le ola a laau, ae faaletonu ai tagata. A fua i le numera o maliu i le vaitaimi lenei o le tausaga pe a fuafua i isi masina, e mālie foi le mātau ae o le tulaga lava lea ua tulai mai i tausaga taitasi.
O le tuaoloa foi e pei ona ta‘ua e le Vaaitau lea e mafua ai le matuā mago o le palapala, ma afai o le malosi lea o le tuaoloa i le eleele pe faamata o le ā tonu lava lona malosi ua matuā aafia ai le soifua maloloina o tagata lautele?
E lē o mālōlō le tumutumu o le Falemai tele i Motootua ona o le numera o tagata ua aafia i le flu. Ua amata foi ona malosi mai lapataiga i le atunuu ina ia vaavaai lelei le siosiomaga mai i le pepesi o faama‘i.
Ua lua nei vaiaso sosoo o vaaia le tumutumu i maota gasegase ma o le faamatalaga lava o loo pepesi le flu i le taimi nei, ma e fautuaina le mafanafana o laei i le po, ia tuuitiitia le ulaula, ia taumafai foi e inu vai mamā ma taumafa tatau auā ua toatele ua taatitia i faiga a le flu. O le fanau laiti lava ma tagata matutua ua tele ina lapatai mai le Soifua Maloloina e vaavaai lelei ona o le afaina ai i le tau ua feagai nei ma le atunuu.
O le isi itu ese ua matauina i le taimi lenei o le tele o le fuata ua lē aogā ona ua foliga mai ua mu fua o ‘ulu a o lei matua ma ua tele ina malili le fuata ulu o loo iai nei. Na o le palasi ma lē aogā.
O lea foi faato‘ā maua sina timu e tau sui mai ai le mago sa iai o le ea ona o le Tuaoloa ma o le fesoasoani tele foi lea i le mago o le eleele i Savaii ma sosolo ai le tele o afi i le Itu o Tane le itu o Asau i lenei masina. I se faatalatalanoaga ma le tamaitai fomai ia Dr. Tia Vaai na ia ta‘ua ai, e lē o mautinoa i le taimi nei po o le ā se fuainumera o i latou ua aafia i lea faamai ae o le tulaga manino o loo pepesi le fulu i le taimi nei.
O āuga o lea faama‘i ua tele ina iloa e le toatele e amata mai i le tale (se‘i tulou), faatasi ai ma le fiva i nisi o taimi ma faasolo atu ai ina aafia ma le manava e ala i le mamafa o le isu (tulou) ma nisi vaega. O le pepē o tino le isi āuga taatele ua faaalia e i latou ua faataotolia ai i le pepesi o faamai.
Ua iai aoga ua matuā faamalolo lelei lava tamaiti seiloga lava ua mautinoa e lē o toe tafe le isu pe tale foi ona faato‘ā toe talia lea e faaauau a‘oa‘oga ona ua toatele tamaiti ua pisia mai ia i latou ua lavea i le flu.
O āuga ia o le faama‘i fulū na ta‘ua e le susuga i le tamaitai fomai e lē tatau ona faatamala ai le atunuu ae a aafia loa se tasi ua tatau ona vave logo pe vaai se fomai mo togafitiga ina ne‘i oo i se tulaga faaletonu.
O loo faagasolo pea auaunaga masani a le Matagaluega o le Soifua Maloloina e fesoasoani ai ia i latou o loo saili fesoasoani atu ona o aafiaga o lenei faama‘i.
