O upu o le tautoga a faamasino o loo galulue i le Faamasinoga o Fanua ma Suafa na faaamamafa e le afioga i le Faamasino Sili, Patu Tiavaasue Falefatu Sapolu, i lana saunoaga autū i le faatautoina o le tamaitai e toatasi ma alii e toaono ua filifilia nei e avea ma faamasino o le Faamasinoga o Fanua ma Suafa a le atunuu.
O le faamaoni o se vaega sili ona tāua e pei ona saunoa le Faamasino Sili, ae e faaopoopo i ai ma le lē faaitu‘au i le tutusa o tagata uma, ma ia aloese mai le faia o ni faaiuga e faavae i le alofa poo le loto tiga.
O se saunoaga na faalia e le Faamasino Sili, e lē gata ina tāua mo faamasino fou ua filifilia, ae faapea foi ona tāua e toe fagufagu ai i le vasega o faamasino uma o loo tauaveina le galuega lea sa auai i le sauniga o le faatautoga.
Na faaiu upu na saunoa i ai lana afioga i lona faailoa i le mamalu o le valaaulia ma le aofia sa faatasi atu o se tasi o faafitauli ua feagai pea ma le Faamasinoga o Fanua ma Suafa.
Faaalia e le Faamasino sili, ua matauina pea ma le toto‘a le toatele o tagata tauto pepelo i luma o le faamasinoga ma ua latou tuuina atu foi ni molimau pepelo ma gafa pepelo o aiga e fai ma a latou mau i se mataupu e suesueina.
O le fautuaga ma le lapataiga a le Faamasinoga e ala mai i le Faamasino Sili, o tagata uma o loo fuafua e tuuina atu ni faiga faapea e ao ona manatua lelei, e lē maua i lalo nei ae maua pe a alu i luga.
O se tasi lea o faafitauli na saunoa le Faamasino Sili o loo feagai pea ma le faamasinoga i le faatinoina o ana galuega i aso taitasi.
O le filifilia o le toaono o faamasino o le Faamasinoga o Fanua ma Suafa na feagai ma le komisi a le faamasinoga lea e toatolu ona sui e taitaifono ai le Faamasino Sili, ae o ona sui e aofia ai le Lloia Sili a le Malo, ma le susuga i le faafeagaiga o Reverend Mautofu.
E to‘a selau ma ona tupu na talosaga i avanoa faamasino, ae to‘a luasefuluono na filifilia mo faatalatalanoaga poo interviews.
I lea aofaiga e 26 na filifilia mai ai le toaono ua avea nei ma faamasino e aofia ai le tamaitai e toatasi le afioga Su‘a Magele Nua Su‘a, Moananu Tuasivi Setu, Leasiolagi Malama Meleisea, Mulipola Iosefo Mulipola, Faamatuainu Saivaega Vasa, ma le afioga Malagamaalii Fiaalua‘e Levi
