“Ua talia e le faamasinoga le molimau a Paul Chan Tung, e lei lelei ona tapena aiaiga o konekarate lakapi”
Ua ioe le Faamasinoga Maualuga e lei lelei ona tapena e le Iuni Lakapi a Samoa aiaiga o konekarate mo tama e filifilia e taaalo i aulakapi mo taaloga faavaomalo. O le molimau a se tasi o tama lakapi o le ‘au taitoafitu a le Manu Samoa o Paul Chan Tung, sa tuuina atu i le Faamasinoga Maualuga sa suesueina le tagi a le alii lakapi o Paul Poulus sa tuua‘ia ai le Iuni faatina i le lē totogia o nisi o faamanuiaga o lana konekarate ina ua aafia i se manuaga.
Na faaalia e Paul Chan Tung e lei lelei ona tapena e le iuni lakapi aoao aiaiga o konekarate, o le mafuaaga lea o le nunumi ma lē manino ai nisi o tuutuuga ma aiaiga. O pepa o faamaumauga o konekarate sa tuuina atu i le faamasinoga e avea ma mau e lagolago ai le tagi a Paul Poulus e tasi le miliona o se taui e totogi e le Iuni lakapi a Samoa, ua ioe le faamasinoga i lana faaiuga ua aumai, e lei tuuina atu se avanoa i le itu tagi e filifili ai i maliega o lana konekarate.
E lua vaega o le tagi faasaga i le soli e le Iuni lakapi a Samoa o aiaiga o le maliega o le konekarate a Paul Poulus ua teena e le faamasinoga, ae peitai ua faamaonia e le faamasinoga e iai vaega tetele o le maliega i le va o le Iuni faatina ma le alii lakapi sa faatamala ai le iuni faatina, e pei o le taimi na manu‘a ai ma malaga i Niu Sila mo togafitiga ae sa lē maua se fesoasoani tau tupe.
Ua faatonuina e le faamasinoga ia totogi atu e le iuni le vaega tupe e NZ$6,792.94 sene tupe Niu Sila i le itu tagi mo le totogiina o ona suesuega faafomai i Niu Sila.
O loo mautu ma maopoopo faamaumauga o le totogi o ia togafitiga faafomai. O loo aafia pea le itu tagi i āuga ona o le manu‘a, ma e manatu le faamasinoga e iai nisi suesuega faafomai e tatau ona faatinoina i le lumanai.
E ui ina manuia sailiga togafiti a le alii lakapi o Paul Poulus, peitai e manatu le faamasinoga e talafeagai se tupe e avea o se alauni mo le totogi o feoaiga auā nisi suesuega faafomai ma ua faatonuina ai le Iuni lakapi a Samoa e totogi atu i le itu tagi le $20,000 tala tupe Samoa mo lea tulaga.
E lē o mafai e le faamasinoga ona taunuu ana iloiloga i se tau aofai tonu o tupe maua ua lē mauaina e le itu tagi ona o le motusia o le olaga lakapi o le itu tagi ona o manu‘aga na aafia ai. Peitai e manatu le faamasinoga o le aiaiga i le va o itu e lua e pei ona sa ofo le iuni e na te vaaia le lumanai o le alii lakapi, o loo iai avanoa sa ofo atu e mafai ai ona a‘oa‘oina e avea le itu tagi ma faiaoga poo se tagata e faia toleniga poo se trainer.
Talu ai le lē mautonu o lea tulaga ua manatu ai le faamasinoga e taatia atu i le va o Paul ma le Iuni lakapi faatina e toe feutagai i se aofaiga o tupe maua ua lē mafai ona maua ona o le taofia o le olaga taalo o lea alii ona o aafiaga i manu‘a e pei ona mafua ai lana tagi i le faamasinoga.
Ua faatonuina e le faamasinoga le totogi uma e le iuni lakapi o le tau o le faamasinoga mo le itu tagi. O le aofaiga o le seleni ua agavaa ai le tagi a le alii lakapi na te maua e $34,000 tala Samoa, ma o se faaitiitiga lea mai le aofai e $1,000,000 na ave i lana tagi autū ina ia totogi atu e le Iuni lakapi a Samoa.
O Paul Poulus sa taalo i se kalapu lakapi i Europa o le London Irish ma se kalapu i totonu o Iapani. Peitai ina ua filifilia mo le ‘au a le Upolu Samoa sa iai se taaloga faasamasamanoa sa faia ma le aulakapi a Siumu ma manu‘a ai ia Aperila o le tausaga e 2006.
Na manu‘a o ia ma lē mafai ona faaauauina ai lona faamoemoe i le aulakapi a Upolu Samoa. O le amataga lea o le mataupu seia oo ina malaga i Niu Sila ma saili togafiti ai, ae taualuga i lona faaulu o se tagi ma tuua‘ia ai le Iuni lakapi a le atunuu i le lē tausisia o aiaiga o lana konekarate ma le leai o sona inisiua na maua.
