Sa maua lo‘u avanoa matou te feiloai ai ma le Ekalesia AOG i Tauranga ma le susuga i le faafeagaiga ia Paulo Leaso ma le faletua faapea le loaloa o le ekalesia. O ia avanoa o loo mafai ai ona faatalatalanoa mataupu eseese, tali foi ma fesili i mea o loo fia maua ai le faamaninoga e le tatou Atunuu. O avanoa foi nei o loo mafai ai ona lesitalaina i latou e lei lesitalaina o latou suafa i le lisi o le aufaipalota, ma toe lesitalaina i latou ua siitia o latou alaalafaga.
O le mataupu pito i sili lava lenei mo lenei taimi, o le lesitalaina o suafa o i latou ua 18 tausaga agai i luga le matua ina ia mafai ona palota i le aso 26 o Novema.
Afai e lei lesitalaina lou suafa i le lisi o le aufaipalota, e lē mafai ona e palota i le faiga palofa faalauaitele a Niu Sila. O loo maua pea le avanoa i soo se Ekalesia poo faalapotopotoga e mafai ai ona ou savalivali atu tatou talanoa ma faamanino atili mataupu o loo tutupu i lenei vaitaimi i Niu Sila. E mafai lava i soo se isi ona faafesootai mai lo‘u Ofisa i le telefoni (09) 275-5345 ma fesiligia se isi o teine faigaluega e faamautu se avanoa tatou te feiloai ai. O le tāua o nei feiloaiga ina ia silafia e le tatou atunuuu le tāua o mataupu o loo finauina auā le manuia o Niu Sila ma a tatou fanau o taitai o le lumanai.
O le vaiaso foi ua mavae sa faateia ai le Palemene o Niu Sila ina ua matou feiloai ma le toatele o faiaoga, mātua ma i latou sa lagolagoina le momoliga i Ueligitone o le talosaga (poo le petition) ma le 5,000 o suafa o latou ua faaali i le sainigalima le talosaga e faasaga i le faigamalo a John Key ina ia faaauau pea le faatupeina o polokalame e a‘oa‘oina ai gagana eseese o le Pasefika i aoga.
Sa faatino ai i lea aso le aliitaeao i tupu ma e‘e faapea foi le susuga i le faafeagaia ia Popo Su‘a ma le usualele ia Tumua ma Pule, Ituau ma Alataua o loo afifio ma alaalatai i le aai tele o Ueligitone.
Ou te manatu faato‘ā faafofoga lea o papalagi o loo galulue i maota tele o le Palemene ina ua alalaga le aumaga ma patipati le alofi o le aliitaeao auā le paia i le aufaigaluega a le Atua, faapea foi aiga e fia sa auai, aemaise foi sui o Atumotu eseese sa mafai ona auai.
O a‘u lenei sa faaofia le talosaga mo le silafia o le Palemene, ma ua taoto nei lea talosaga i le maota fono faitulafono auā le galuega Iloilo a le Malo e tatau ona faia i ai.
E ui i lea na maua loa lo‘u avanoa i le Aso Lulu ua tea o‘u lauga sa‘o loa lea i le Minisita o Aoga, pe aisea le mea ua ia taofia ai le faaauauina o tusitusiga o le Tupu ma le Folauga o loo faaaogā e aoga mo le a‘oa‘oina o gagana eseese o tagata Pasefika.
Pe aisea le mea ua ia taumafai ai e a‘oa‘o na o le gagana Peretania, ae o le toatele o fanau a tagata Pasefika e malamalama i gagana e lua? Ou fai atu lava i ai e aua le avea lona vaivai ma le lē iloa tautala i se isi lava gagana se‘i vaganā le Igilisi, ma mafuaaga ua ia taumafai ai e taofi le a‘oa‘oina o gagana ia matou fanau o lea e “bilingual”, lea o loo malamalama i gagana e lua.
Na matuā lē fiafia lava le Minisita i la‘u faamatalaga lea, peitai ane ua lē mafai lava ona taofi lo‘u naunau ina ia lagona le tāua o loo faatāuaina ai e latou na momoli maia le talosaga i le vaiaso ua tea ina ia faatāua polokalame o loo a‘oa‘oina ma faalauaiteleina le faaaogā o gagana a tagata Pasefika.
O le vaiaso foi lenei faato‘ā ioe mai ai le Malo ina ia talia le talosaga a le Itu agai e faia se suesuega ma le iloiloga o le mafuaaga ua mafua ai le maualuga o le tau o le suasusu taumafa, a o le suasusu lava lea o loo gaosi i Niu Sila, e lē o se suasusu mai se isi atunuu.
E lē gata i lea ua matou mātauina pea, ua maualuga tele le tau o le suasusu, ae o loo faatau i se tau taugofie i atunuu i fafo e pei o Saina, a o le suasusu lava lea o loo gaosi e le kamupani Niu Sila lava e tasi mai manupapalagi Niu Sila.
O lea o loo tupu nei i le mātou mātauina i lenei faigamalo, e ui ua taugata tele le tau o le soifuaga, ae e lē talitonu i ai le alii o John Key ma lana vaega.
Fai mai lava latou o loo lelei mea uma, o loo tele tupe a tagata. O isi foi taimi pe a maua i fesili a le Taitai o le Itu agai, le afioga ia Lilomaiava Phil Goff, ua liliu mai le Malo ma tali mai matou fesili faapea e ala ona faigata le tausiga o aiga ona o le paiē o tagata e faigaluega. E matuā musu lava e talitonu o le toatele o aiga ua faaletonu lava le tamaoaiga talu ai le taugata o le tau o meataumafa o iai nei, ae o lenei lava o loo tumau galuega i se tulaga maualalo.
I faamaumauga lava a matagaluega a le Malo ua manino ai ua sii le tau o le soifuaga (poo le cost of living) i le 5.3 pasene le maualuga, ae o le siitaga o tau o mea taumafa ua sii i luga i le isi 7.5 pasene.
E ui i le maualuga o nei siitaga, aemaise le siitia o le tau o le suasusu ma fualaau aina ma fualaau faasua, ae pau lava le siitaga ua maua e nisi o le aufaigaluega, e nao le 1.9 pasene le siitaga. O lona uiga e na o le 25 sene na maua e i latou o loo aupito i sili ona maualalo o latou totogi.
O le aso 24 o Aukuso o le a afio mai ai le afioga ia Lilomaiava Phil Goff e feiloai ma lo tatou Atunuu i Magele i le maota o Pukapuka i Magele lava i le itula e 3pm. O lenei avanoa o le a mafai ona tatou feiloai ai ma faamanino atili ai foi nisi o mataupu ma fuafuaga ua faataatia nei a o faagasolo atu i le faigapalota i le aso 26 o Novema. O le taimi lava lenei e suesue ai ma sailiili ina ia manino lo tatou Atunuu i mataupu o loo finauina nei e le aupolokiki, ina ia atoa i ai le silafia, ona fai faatatau lea i ai o le filifiliga a le tagata lava ia. Manuia galuega o lenei vaiaso fou.
