Ua matuā lē masino le mau taumafaiga ua vaaia i Samoa ina ia tau tuuitiitia le numera o tagata o le tatou atunuu e taumafa tapaa.
O se taumafaiga ua silia ma le 20 tausaga o unai mai lava. Ua fai tulafono e taofiofi ai ae o loo tumau le faatuputupulaia o le numera o tagata o Samoa ua aafia soifua maloloina aemaise i le gasegase o le kanesa, le gasegase o le fatuga‘o ma le aafia o le fatu ona o le ulaula.
O lea foi la ua faato‘ā mae‘a atu le faamanatuga o le aso ua unaia e Malo Aufaatasi ina ia saga momoli ai le feau tāua lenei, “E te oti i le tapaa”. O le taulai o lenei tausaga o le iloilo lea o fuafuaga faataatitia ua mae‘a faalauiloa e faatatau lava i lenei oloa.
O tulafono ua iai nei e faatatau i lenei faafitauli, o le tapu lea ona toe ulaula se isi i totonu o taavale poo pasi.
Tapu ofisa o le Malo ona toe ulaula ai ae ua faatonuina i latou e lē mafai ona tuu lea faiga ua fautuaina le o ese ma nofoaga faitele nei e ulaula ai. Ua faamalosia tulafono o le tapu o le ulaula i fale ava ma fale siva.
Ua faasā ona toe faatau taitasi le tapaa, ua sā foi fanau ona o latou toe faatauina mo tagata matutua le tapaa, ae o loo vaaia pea lava foi lea tulaga.
Ua sii tailua tausaga le tau o le sikaleti lea ua $8.20 sene le pepa lapoa ae $4.10 le pepa laititi.
O lea foi ua toe faalauiloa e le Alii Palemia i le folasia o le Tala Faatatau o le Tupe a le atunuu, se isi siitaga e lē o toe mamao o le sikaleti ma le ava malosi, o se tasi lava lea o auala ua vaaia ai le galue o le Malo e ala i le Matagaluega o le Soifua Maloloina ina ne‘i e aafia ai i ni gasegase tuga.
E ui i lea o loo vaaia ma le faanoanoa suesuega a le Matagaluega o le Soifua Maloloina o le 74% o faleaoga i Savaii ma le 72% o faleaoga i Upolu o loo matuā tapu ai lava le toe taumafa ai o se tapaa e soo se tasi i totonu o lotoā nei.
O lona uiga o loo iai lava le isi lata i le 20% o aoga o loo molimauina ai lava le ulaula o faiaoga i totonu o le lotoā a le aoga.
Faaalia e le Minisita o le Soifua Maloloina, le Afioga Tuitama Dr Talalelei Tuitama, ua sili foi i le 70% o faiaoga ua taofi lava le ulaula ae o le isi lata foi i le 20% o loo faaauau ona faia lea tulaga.
O le unai a le Matagaluega o le Soifua Maloloina ina ia mafai e le Matagaluega o Aoga, Taaloga ma Aganuu ona o latou faatautaia ni aiaiga e matuā tapu ai loa le ulaula o se faiaoga i taimi o aoga a le fanau.
O se sauniga na faatautaia i luma maota o le Ofisa Tutotonu o le Soifua Maloloina i Motootua na faamanatu ai lenei aso tāua i le kalena a le Soifua Maloloina.
O le mau a le Minisita e tatau ona lē toe vaaia se sikaleti i Samoa i lenei vaitaimi, ae e pei lava ona laga soo lenei mataupu, e faigofie ona faaali le finagalo lenei ae e faigata tele le faatinoga.
Ua toatele ua faaali finagalo, ua tatau loa ona tapunia falegaosi sikaleti i Samoa ae e faitau miliona tala o loo maua e le Malo e ala i lafoga o loo totogi e le falegaosi oloa lenei i le atunuu ma o loo agai i le tamaoaiga o Samoa lea seleni.
O le mafuaaga tonu lea o le lē mafai ona taofi o lea foi tulaga.
O lea la ua taulai nei le Matagaluega e faalauiloa aafiaga o le taumafa tapaa, aemaise lava i fanau aoga ma ua tusa nei ma le 10 tausaga talu ona faatautaia le tausinioga a aoga i le lakapi a tama o loo unai ai le feau lenei o le taofi o le taumafa tapaa ona o aafiaga o le ola talavou o fanau ma le aafia ma taofia ai le ola naunau e taaalo.
O le Smoke Free School Boy Rugby o loo faagasolo i tausaga taitasi ma o le faamautu ai o le lagolago a le Matagaluega o le Soifua Maloloina i lenei taamilosaga, o lea na foai ai i le sauniga lenei ni togiga lakapi mo le ‘au a tama aoga mai i Lepa ma Lotofaga i Upolu ma le Kolisi Maualuga i Asau ma lana foi au lakapi.
O se fesoasoani lea i aoga e lē o mafai ona maua ni togiga i le Taamilosaga lenei o le Lakapi a Tama Aoga a Samoa lea ua amata nei foi ona faagasolo.
