A e pulu naunau i se moemitiga mo se lumanai lelei, ae faamoemoe pe faatuatua e mafai ona ata mai, tusa poo ā ni mauga tetele e te aea, e te taunuu ma le manuia.
E faapena foi moemitiga o le Taitai Aoao, o le Ekalesia Assembly of God, Rev Mareko Sanerivi ua leva ona tuu atu i talosaga. O le taitai Matagaluega a Sydney Pastor Lanofaatasi Polutele, na faatagaina le amataina o le aoga.
E faafetaia le agalelei o le Silisiliese, ona e ui ina sa fau ao, fau po le faamoemoe, fetaiai foi ma lavelave, ae lei maluelue le faatuatua, e mafai e le Atua ona faatinoina. Ua filifiliina le Faith City, o loo i lalo o le vaaiga a Pastor Opeta Tautalafua ma le faletua o Carol, e faataitai ai pe e lelei le gasologa o le aoga.
Ua faaigoaina le aoga fou, o le Faith Leadership College, ma o lea foi ua iai la latou faiga paaga ma isi aoga ua mae‘a ona resitala aloaia.
O le afiafi o le Aso Sa, na molimauina ai le tatalaina poo le amataina o le aoga, o lea lava po na tonu ai i finagalo o le faatamā i le Taitai Aoao o le Matagaluega Pastor Lanofaatasi, ma alii faiaoga o Pastor Opeta, Willie Unasa ma Vanu Sanerivi, e faataunuu ai ma le uluai vasega faale-Tusi Paia.
O faiaoga fesoasoani o Pastor Iliafi Esera, Ofisa Jerome ma Solomona Mageo.
E maualuga se faamoemoe pe a malolosi ni pola puipui, e pei o le faamoemoe, ona o le masii mai o le aufaigaluega paia a le Atua, ae tainane foi nisi o tamalii iloga o le atunuu, e lagolagosua i le taumafaiga.
Nisi o faafeagaiga ma o latou faletua, Pastors Siliaga Nelson, Faitoaga Soloi, Panapa Tavui, Stanley Jackson ma Toleafoa na auasa mamao mai Niu Sila.
Na muai saunoa Pastor Opeta i upu ma le agaga faagaeetia ona o le alofa naua o le Atua ua ata mai ai moemitiga, ua leva ona saafiafi i ai.
O talosaga faatauanau, e lē asa lea i aso uma, ae e momoli uma ma le faatuatua, e mafai e le Tamā o i le lagi ona faatinoina. Faapea foi ona faafetai i le Taitai Aoao o le Matagaluega, i le faatagaina o le aoga. Matagofie foi le auai o le mamalu lasilasi aemaise tupulaga talavou. Saunia le tatalo o le faapaiaina o le aoga e le Taitai Aoao o le Matagaluega Pastor Lanofaatasi.
Aisea na faavaeina ai lenei aoga? O le tali poo le mau mai le Tusi Paia, auā a leai se faaaliga e fano le nuu.
O le finagalo aufaatasi o taitai o le Ekalesia AOG e faatino loa le aoga mo ana tupulaga talavou, ona o mafuaaga nei e tolu, (1) Ia saga tonu i totonu o faiga lotu. (2) Ia faaaogāina faifeau mai totonu o le Ekalesia ua mae‘a ona a‘oa‘oina. (3) A oo ina matutua faaleagaga, e faigofie lea mo le faifeau.
O le aoga e tapenapena ai faaleagaga soifua a‘oa‘oina o alo ma fanau a le Ekalesia, auā le galuega mo a taeao.
Na sosoo lea ma le semina poo le mataupu na saunia e le alii talavou o Willie Unasa na malaga mamao mai Melbourne, a o le a‘oa‘o ia Vanu Sanerivi na saunia lana semina i le olaga o Keriso. Na saunoa o ia e faamalamalama le soifuaga o lo tatou faaola.
Na logomalie i le faafofoga a le mamalu lasilasi mataupu na saunia e alii faiaoga, ona o ni alo ua iu mai i a‘oa‘oga faapenei, ma ua onomea foi le tofiaina o i latou e faatautaia le Faith Leadership College.
O loo lagolagoina foi lenei kamupani e le Go Tours Travel, o se auaunaga a le faletua o Pelei Leato, ua loa tausaga o tautua i le atunuu, ma e malamalama lelei i ou manaoga ma lau gagana, mo soo sau faigamalaga mo Samoa, Niu Sila poo soo se vaipanoa o le lalolagi.
O le Faith Leadership College e i le Unit 13 Lyn Parade Preston. O vasega e faia i afiafi o le Aso Sa i le itula e lima ma le Aso Gafua i le itula e ono.
E na o le $10.00 le ressitalaina o lou suafa ma le tau atoa o lau aoga, o lona uiga o loo galule pe foai fua le tomai ma le taimi o faiaoga, auā sou lumanai lelei.
Ae talosia ia i le faamalumaluga a lo tatou Silisiliese, ina ia avea ai ma faataitaiga lelei lenei taumafaiga matagofie, ua mafai ona faamaopoopoina e le Ekalesia AOG Matagaluega a Sydney, e avea ma se luitau mo o tatou olaga fai a‘e. Auā o le faatuatua e ala atu i talosaga ua tino mai ai le Faith Leadership College.
