E lē faia se upu i se toatele ae mafai ona faapea e toalaititi ae faimea mafai pe, ‘E laitiiti ae ma‘ini’.
E ui ina toagaogao lenei Asosi ma ua taugata foi le soifuaga i lenei vaitaimi, peitai e lē o faapito le alolofa o nei tamaitai, e ala i le faaaluina o o latou taimi ma seleni e aualofa atu ai i alo ma fanau o iai le manaomia i Samoa.
E faatasi i le tausaga ona faia e tamaitai tuai o le kolisi a St Marys i Samoa (SMOGA) o loo alaala i Brisbane, se fiafia tele e valaaulia ai le mamalu o le atunuu, e lē gata o mafutaga ma faalapotopotoga, o Ao o faalupega ma taitai o Ekalesia, ae faapea foi aiga, uo ma ē masani.
O se faamoemoe na malaga aloaia mai ai le Hai-komesina o Samoa i Ausetalia, Afioga Lemalu Samau Tate Simi, e avea ma malo faaaloalogia.
Na auai le afioga Patele Epati Tamati o le faauluuluga o le Puleaga Katoliko a Kuiniselani, tamaitai Sā, faapea taitai o alaleo ma le aufaasalalau i Brisbane. Sa auai le Peresitene o le Mafutaga a le Aiga Samoa i le itu i Matu, afioga ia Taulapapa Lemalu Roy Slade, ma le Afioga Tofaeono Misa Tauveve Joseph Holywood.
O le tausaga ua mavae, na faatino pe laeiina e le auvalaaulia matapulepule, ae o le tausaga lenei sa laeiina ai laei o le tupu ma le masiofo.
Na vaaia foliga eseese ua faapei lava o ni tupu ma ni masiofo moni, e i latou sa mafai ona faatinoina nei laei. Sa faatumulia lea po i le lagolago mai a le atunuu i le faatalauula atu a le SMOGA.
O le faletua ia Agnes Felix, o le Peresitene o le SMOGA, failautusi o le faletua ia Joyita Stanley Slade ma nisi o sui o le Asosi, e aofia ai Joyita Filemu, Pearl Tupua, Teresa Washburn, Foloi Wall, Leticia Lam ma Mulitalo Tauline Tamafai Virtue.
O le faamoemoe maualuga o nei tamaitai tuai e mafua ai lenei faamoemoe i tausaga uma, ina ia maua se seleni e fesoasoani atu i nisi o alo ma fanau o loo latou faatupeina a latou a‘oa‘oga i Samoa, e ala i Sikolasipi e aooga fua ai.
O se fiafiaga sili lea i nai mātua ma aiga, ona o lenei fesoasoani o loo tuuina atu e le SMOGA i Brisbane.
