E ui ina taufaaofiofi oloa ona o le pumoomoo o le container lea ua faaaogāina e Hitesh (James) ma Ila Ravji e faaauau ai le la auaunaga masani, ae sa lē taofia ai le lolofi atu o tagata faatau e tulituliloa le Triton Dairy ua 43 tausaga talu ona faatūina i totonu o le pitonuu o Sydenham i Kalaiesetete.
E ui ina feagai ma mu, fetaiai ma mafui‘e aemaise le fesifiai faatolu i nisi nofoaga sa lei maluelue ai le mafaufau o lenei tautai mataalia o James e faamuta le auaunaga, aemaise o le lagolago malosi a lona tamā, Dale Ravji lē sa asaina le gasū o le taeao.
I le mae‘a o le mafui‘e i le masina o Setema, sa tapunia mo le tolu vaiaso, ina ua tatala sa faigata lava ona o auala uia ua faaleagaina, peitai ina ua lulu le mafui‘e ia Fepuari lea sa matuā afaina ai loa ma ua masofa le fale ma pisinisi uma o lea ogaeleele.
Na ta‘ua e James i le tusitala e feololo nai tagata Toga ma Samoa sa fai faatau i lea aoauli, ina ua tupu le faalavelave na lafoai faatau, tiai seevae tosotoso o tamaiti ae afisi le fanau ma tamomoe i fafo mo se saogalemu, ae faafetai e leai se isi na maimau le soifua.
O le pitonuu o Sydenham e faigofie e tagata Pasefika ona afea mo faatauga, o le auaunaga a James Hitesh ma lona aiga ua tautuaina le atunuu ma ua pei ai lava lenei alii o se Samoa moni i ona uiga fiafia ma le loto fesoasoani.
Sa faagasolo lana tautua mai lona faletaavale i Beckenham, peitai lea ua maua le avanoa e faatuina ai le container i le nofoaga masani auā le auaunaga mo tagata Pasefika, aemaise le nusipepa o tala fou i vaiaso uma o le Samoa Times.
Ua faailoa mai e James e lē fia siitia ese mai Sydenham ma e toe fausia foi se isi fale fou i se taimi ua fuafuaina, ma ia faafetaia ai le lagolago malosi a le aufaatau aemaise le mamalu o Samoa o loo fiafia pea e asiasi i si ona tulimanu ma faatau e lē gata i oloa faa Pasefika ae faapena i le tatou nusipepa o le Samoa Times.
